Cláir spóirt an 20 clár is mó a mheall lucht féachana do TG4 in 2022

Dé hAoine, Eanáir 20 2023 ag 5:50 am

Tá léargas eile ar a thábhachtaí is atá an spórt do TG4 ar fáil i bhfigiúirí nua. De réir na bhfigiúirí nua cluichí CLG agus rugbaí ab ea gach ceann den 20 clár is mó a mheall lucht féachana do TG4 anuraidh.

Nuair a d’fhógair an stáisiún an tseachtain seo go raibh méadú tagtha ar a lucht féachana in 2022, an tríú bliain as a chéile go raibh ardú i gceist, tugadh le fios gur cluichí a bhí sna cúig chlár ba mhó a mheall lucht féachana anuraidh.

Léiríonn figiúirí nua a chuir TG4 ar fáil do Tuairisc, áfach, gur craoltaí spóirt a bhí sa 20 clár is mó a mheall lucht féachana i rith na bliana agus nár mheall aon chlár eile meánlucht féachana níos mó ná 100,000 duine.

Cluiche Ceannais Peile Allianz idir Ciarraí agus Maigh Eo an clár ba mhó lucht féachana anuraidh. 228,000 duine a d’fhéach ar an gcluiche sin ag tús mhí Aibreáin agus sciar 30.2% den lucht féachana aige ag an am. Ba é Cluiche Ceannais Pheil na mBan idir an Mhí agus Ciarraí an dara clár ba mhó a breathnaíodh air in 2022. Bhí meánlucht féachana 206,000 duine aige sin, sciar 30.3%.

Bhí dhá chluiche rugbaí i measc an 20 clár ba mhó ar TG4 in 2022, an cluiche idir Cúige Mumhan agus Cúige Laighean Lá Fhéile Stiofáin – a raibh meánlucht féachana 144,000 aige – agus an cluiche idir na Muimhnigh agus Cúige Chonnacht ar Lá Caille 2022 – a mheall meánlucht féachana 118,000.

Cluichí peile agus iomána a bhí san 18 clár ba mhó féachana eile – Sraitheanna Allianz, Craobh Pheil na mBan, comórtais na gclubanna agus comórtais idirchontae faoi aois.

Ní hé TG4 amháin a bhíonn ag brath go mór ar chraoltaí spóirt chun lucht féachana a mhealladh, áfach. Ba é The Late Late Toy Show an clár ba mhó lucht féachana in Éirinn in 2022, le meánlucht féachana 1.33 milliún, ach cluichí spóirt a bhí i 14 den 20 clár is mó a mheall lucht féachana. Spórt a bhí i gceist le 30 den leathchéad clár ba mhó lucht féachana. Ar ndóigh, bhí tionchar ag Corn Sacair an Domhain ar na figiúirí sin.

Nuair a chuirtear cluichí spóirt as an áireamh, cláir cheol tíre a ghnóthaigh cuid de na figiúirí féachana is mó a bhí ag TG4. Bhí meánlucht féachana 96,000 ag Opry le Daniel – Ómós do Joe Dolan a craoladh ar an 28 Nollaig agus bhí cúig eagrán eile de Opry le Daniel i measc an 20 clár is mó féachana ar TG4 nuair a cuireadh cláir spóirt as an áireamh.

Bhí rath ar an tsraith nua, Contractors, a craoladh i rith an earraigh. Bhí gach ceann de na seacht gclár sa tsraith i measc na gclár is mó lucht féachana ar TG4 nuair a chuirtear cláir spóirt agus cheoil as an áireamh. Meánlucht féachana idir 75-52,000 a bhí ag an tsraith inar tugadh léargas ar chonraitheoirí feirmeoireachta a thugann cúnamh d’fheirmeoirí.

Bhí dhá chlár den tsraith nua Hector – Balkans go Baltics i measc na gclár is mó lucht féachana sa rannóg seo chomh maith. Bhí trí chlár sa tsraith i measc na gclár is mó lucht féachana nuair a chuirtear cláir spóirt agus cheoil as an áireamh.

Bhí eagrán amháin de Nuacht TG4 i measc an 20 clár ba mhó lucht féachana nuair a chuirtear an spórt agus ceol as an áireamh. Bhí an clár áirithe sin ar an aer díreach i ndiaidh an chluiche rugbaí idir Cúige Chonnacht agus Cúige Mumhan Lá Caille agus meastar go bhféadfadh gurbh in a d’fhág na figiúirí féachana a bheith níos airde an lá sin.

Tuigtear go bhfuil an lucht féachana ag Nuacht TG4 cuid mhaith níos ísle de ghnáth ach níl an stáisiún sásta figiúirí féachana don chlár ná do 7Lá a fhoilsiú.

Sciar 1.96% den lucht féachana in Éirinn a bhí ag TG4 in 2022, ardú ón 1.8% a bhí i gceist in 2021. Is é sin an sciar is mó den lucht féachana a bhí ag TG4 in aon bhliain ó 2011.

Ná Cláir ba mhó ar TG4 i 2022
Ord	Clár	Dáta	Am chraoladh	Meán (000)	Ard (000)	Aimsiú (000)	Sciar (%)
1	GAA Beo – CC Peile Allianz R1 – Ciarraí v Maigh Eo	03-04	15:42 – 18:04	228	306	468	30.2
2	Peil na mBan Beo – CC Sinsear TG4 – An Mhí v Ciarraí	31-07	15:40 – 17:56	206	281	446	30.3
3	GAA Beo – Sraith Iomána Allianz – Tiobraid Árann v Cill Chainnigh	13-02	15:30 – 17:34	189	266	381	22.3
4	GAA Beo – Sraith Peile Allianz – Tír Eoghain v Muinceachán	30-01	15:30 – 17:32	155	190	364	19.4
5	GAA Beo – Sraith Peile Allianz – Tír Eoghain v Áth Cliath	13-03	15:31 – 17:30	149	193	351	18.6
6	Rugbaí Beo – Mumha v Laighin	26-12	18:50 – 21:40	144	267	499	11.4
7	GAA Beo – Sraith Peile Allianz – Tír Eoghain v Cill Dara	20-02	15:32 – 17:34	144	189	359	16.4
8	GAA Beo – CLC Iomána Allianz R1 – Loch Garman v Port Láirge	27-03	15:33 – 17:31	136	174	325	25.1
9	GAA Beo – CC Iomána Allianz R1 – Port Láirge v Corcaigh	02-04	18:49 – 21:19	125	208	376	11.8
10	GAA Beo – Sraith Peile Allianz – Cill Dara v Áth Cliath	27-02	13:16 – 15:28	123	176	348	16.5
11	Rugbaí Beo – Connachta v Mumha	01-01	16:45 – 19:13	118	204	404	11.0
12	GAA Beo – Sraith Peile Allianz – Áth Cliath v Dún na nGall	20-03	15:33 – 17:30	118	151	319	15.1
13	GAA Beo – CLC Iomána na hÉireann AIB – Na Seamróga v Naomh Tomás	23-01	15:08 – 17:04	114	187	278	14.6
14	GAA Beo – Sraith Peile Allianz – Maigh Eo v Dún na nGall	30-01	13:12 – 15:25	113	211	322	18.7
15	GAA Beo – Sraith Iomána Allianz – Luimneach v Corcaigh	27-02	15:33 – 17:31	113	194	333	10.3
16	GAA Beo – CC Iomána na Mumhan AIB – Baile Mhic Gonair v Cill Mocheallóg	09-01	15:11 – 17:09	112	145	280	14.7
17	GAA Beo – CC Iomána na hÉireann Mionúr – Tiobraid Árann v Uíbh Fhailí	03-07	13:00 – 15:13	110	187	319	18.3
18	Peil na mBan Beo – CC Idirmheánach TG4 – Laois v Loch Garman	31-07	13:28 – 15:35	109	155	293	21.1
19	GAA Beo – Sraith Peile Allianz – Ciarraí v Dún na nGall	20-02	13:13 – 15:26	109	161	300	15.6
20	GAA Beo – CLC Iomána Allianz R1 – Corcaigh v Cill Chainnigh	26-03	18:45 – 21:14	107	197	328	9.9