Chrochfadh sí an sagart den altóir le bréaga

Chrochfadh sí an sagart den altóir le bréaga. Bréagadóir maith í.

D’fhéadfá a rá freisin go gcuirfeadh duine dath dubh ar an mbán le bréaga.

Sea nó go n-inseodh sé an oiread bréaga is a dhéanfadh mada de shodar.

Nó aríst eile d’fhéadfá a rá go gcuirfeadh sé bréag ar na naoimh.

Béal na bréige a thugtar ar an mbréagadóir.

Tugann daoine fianaise bhréige i gcúirt.

Is ionann moladh bréige agus moladh mí-ionraic.

Focal eile ar bhréag is ea éitheach.

Seo cúpla focal eile fós ar bhréag mhór: fadhbóg, pait, gailleog.

Cuirtear airgead bréige thart scaití. Tá planda ann ar a dtugtar cróch bréige Is minic a chuirtear bréag ar dhuine.

Is fíor sin gan bhréag, gan áibhéil—gan amhras. Níl smid bhréige sa méid sin.

Tá ainmhithe ann a ligean bás bréige orthu féin.

Sileann cuid de na daoine deora bréige.

Fear bréige a chuirtí i bpáirc arbhair leis na préacháin a dhíbirt. Taibhse préachán ainm eile air.