Ceist an ghanntanais múinteoirí fisice sa Ghaeltacht ardaithe leis an Aire Oideachais

Tá ganntanas múinteoirí fisice sa Ghaeltacht pléite ag an Aire Oideachais.

Thug an tAire Oideachais le fios i bhfreagra ar cheist Dála go bhféadfadh sé go mbeadh 13 múinteoir breise atá páirteach i gclár scilbhisithe ar fáil le fisic a mhúineadh i nGaeilge.

130 múinteoir iarbhunscoile atá páirteach sa chlár scilbhisithe atá dírithe ar mhúinteoirí nach bhfuil cáilithe san ábhar ach ar mian leo fisic a theagasc.

As an 130 múinteoir, thug 13 díobh le fios gur mian leo an t-ábhar a theagasc trí mheán na Gaeilge.

An Teachta Dála de chuid Fhianna Fáil Seán Haughey a chuir an cheist ar an Aire Oideachais faoina bhfuil á dhéanamh aici chun dul i ngleic leis an ghanntanas múinteoirí fisice sa Ghaeltacht.

Mar fhreagra ar an cheist, dúirt an tAire gur bunaíodh an tionscnamh e-Hub, faoina ndéanann múinteoirí ábhar a theagasc ar líne do scoileanna éagsúla, le réiteach a fháil ar an fhadhb.

In 2019 a bunaíodh an e-Hub, atá mar chuid den Pholasaí Oideachais don Ghaeltacht.

Faoi láthair, tá an fhisic á teagasc fríd an e-Hub i naoi n-iarbhunscoil sa Ghaeltacht. Tá beirt mhúinteoirí ag múineadh na fisice ar an e-hub do 20 dalta atá ag freastal ar scoileanna Gaeltachta. Anuraidh, rinne 13 dalta Gaeltachta a thug faoin chúrsa fríd an e-Hub scrúdú fisice na hardteiste.

Tá fadhb mhór le tamall de bhlianta anuas ag scoileanna Gaeltachta agus lán-Ghaeilge teacht ar mhúinteoirí oilte a bhfuil Gaeilge líofa acu.

Is iad na hábhair is mó a mbíonn deacrachtaí ann múinteoirí oilte a bhfuil Gaeilge acu a earcú ná ábhair eolaíochta, teangacha agus eacnamaíocht bhaile.

I suirbhé a rinne Tuairisc in 2021, dúirt 22 as 28 príomhoide iarbhunscoile sa Ghaeltacht go raibh orthu múinteoirí nach raibh Gaeilge acu a earcú le hábhair áirithe a chur ar fáil ina scoil.