Bhí Ard-Stiúrthóir TG4 Alan Esslemont i measc an 3,000 duine ar bronnadh saoránacht na hÉireann orthu ag searmanais speisialta a bhí ar siúl i gCill Airne an tseachtain seo.
As Albain ó dhúchas d’Alan Esslemont atá ina chónaí in Éirinn le blianta fada.
Ag labhairt dó le Tuairisc.ie aréir, dúirt Esslemont, a bhfuil cónaí air i gCinn Mhara i gCamas i nGaeltacht Chonamara, gur údar mór mórtais dó gur saoránach de chuid na hÉireann go hoifigiúil anois é.
“Bhí mé an-bhródúil gur éirigh liom a bheith i mo shaoránach Éireannach tar éis beagnach 35 bliain a bheith i mo chónaí anseo. Is as Maigh Eo mo bhean agus is sa nGaeltacht a tógadh an cúigear clainne atá againn. Chomh maith le bheith i m’Éireannach anois, beidh mé fós i m’Eorpach. Tá sé sin tábhachtach dom mar dhuine a chaith os cionn dhá bhliain sa bhFrainc agus san Eilvéis sular tháinig mé anseo.”
Trí Ghaeilge a bhain Esslemont saoránacht na hÉireann amach.
“Trí Ghaeilge a rinne mé an próiseas ar fad – na foirmeacha agus an comhfhreagras – agus bhí an bhean ón Roinn Dlí agus Cirt a bhí ag plé liom an-lách ar fad. Inné i gCill Airne bhí searmanas álainn leis an Aire Paschal Donohoe [ar bhain a bhean féin saoránacht amach] agus an Breitheamh Bryan McMahon agus rinne mé an ‘dearbhú dílseachta’ agus an ‘gealltanas’ i nGaeilge. Labhair Bryan McMahon faoi thábhacht na Gaeilge ach ní dóigh liom gur cheap sé go raibh mórán sa seomra a thuigfeadh í!” arsa Ard-Stiúrthóir TG4 le Tuairisc.ie.
Ghlac daoine ó bhreis is 120 tír páirt i searmanais na bliana seo.
Cuireadh tús leis na searmanais saoránachta do dhaoine a n-éiríonn leo saoránacht na hÉireann a bhaint amach seacht mbliana ó shin.
Ceapadh Alan Esslemont ina Ard-Stiúrthóir ar TG4 in 2016. D’oibrigh an tAlbanach le TG4 ó thréimhse a bhunaithe go dtí gur fhág sé an stáisiún chun dul ag obair le BBC Alba nuair a athcheapadh Pól Ó Gallchóir ina cheannaire ar an stáisiún Gaeilge in 2008.
Cé gur thug sé ocht mbliana ag obair le BBC Alba, níor bhog sé féin ná a chlann riamh ó Ghaeltacht Chonamara.
Lillis Ó Laoire
Comhghairdeas le hAlan!