Cáineadh déanta ag iarrthóir toghcháin de chuid Shinn Féin ar pholasaí oideachais an DUP

Tá cáineadh géar déanta ag iarrthóir toghcháin de chuid Shinn Féin ar pholasaí nua oideachais an DUP a deir go rachaidh an páirtí i ngleic leis an “gcóir fhabhrach” atá á tabhairt do Ghaelscoileanna agus scoileanna nua á dtógáil.

Dúirt Rosie McCorley, iarrthóir Shinn Féin do Bhéal Feirste go raibh seasamh an DUP “as alt” le tuairim an phobail i leith an Ghaeloideachais agus nach bhfillfear ar an “leithcheal” a dhéantaí air.

“Léirigh os cionn 95% díobh sin a d’fhreagair an próiseas deiridh comhairliúcháin ar Acht Teanga meon i leith na Gaeilge sa phobal atá i bhfad níos dearfaí ná an meon atá á léiriú ag ceannairí aontachtacha.

“Tá sé fíor-aisteach go mbeadh duine ar bith ag iarraidh na cosa a bhaint de chuid d’earnáil an oideachais a bhfuil an rath is mó uirthi le 30 bliain anuas. Tá buntáistí an dátheangachais léirithe go maith. Tá na torthaí a thagann ó earnáil an Ghaeloideachais thar barr,” a dúirt sí.

Dúirt sí nach mar gheall ar “chóir fhabhrach” a thugtar maoiniú don Ghaelscolaíocht ach mar gheall ar an éileamh mór atá ar an gcineál sin oideachais agus mar gheall ar an easpa infheistíochta a rinneadh ann le blianta fada.

“Bhíodh sé coitianta go maith, faoin rialú díreach ón mBreatain, nach dtugtaí maoiniú do scoileanna agus go mbíodh páistí á múineadh i gcóiríocht nach raibh sách maith, déanta na fírinne. Ní fhillfear ar na laethanta sin,” a dúirt sí.

Idir an dá linn, tá a cuid tacaíochta tugtha ag ball eile de Shinn Féin, an Feisire Eorpach Liadh Ní Riada, do Chonradh na Gaeilge agus an cás cúirte atá le glacadh acu i gcoinne Fheidhmeannas Stormont.

D’fhógair an Conradh ag tús na seachtaine seo go bhfuil cás á ghlacadh acu mar nach bhfuil a ndualgais i leith na teanga á gcomhlíonadh ag an bhFeidhmeannas. Deir an Conradh gur sárú ar dhualgais reachtúla an Fheidhmeannais é nár ghlac an Feidhmeannas go fóill le Straitéis na Gaeilge 2015-2035.

Ag labhairt di i gCorcaigh inné, dúirt an Ní Riada go “leanfaidh sí [uirthi] ag tacú leis an Aire Ní Chuilín agus leis an gConradh agus iad ag lorg tacaíochta, aitheantais agus cothromaíochta” do phobal na Gaeilge.

“Leanfaidh Sinn Féin ag gníomhú i gcoinne an leithcheal i dtaobh na Gaeilge, in Éirinn agus san Eoraip. I gcomhpháirtíocht leis an Líonra Eorpach um Comhionannais Teanga (ELEN) beidh Éisteacht Teanga i bParlaimint na hEorpa á chur i láthair agam an 1 Meitheamh.

“Beidh béim ar leith ar chur chun cinn, cosaint agus cothromaíocht na Gaeilge agus teangacha neamhfhorleathana na hEorpa. Tá sé thar am toil agus gníomhú polaitiúl i dtaobh na Gaeilge a fheiscint ó gach páirtí,” a dúirt Ní Riada.