Caighdeán uisce den scoth ag 80% de thránna Gaeltachta – tuarascáil nua

Níl droch-chaighdeán ag baint leis an uisce ag aon cheann den 20 trá Ghaeltachta a luaitear i dtuarascáil nua de chuid na Gníomhaireachta um Chaomhnú Comhshaoil.

De réir na tuarascála Bathing Water Quality in Ireland — A Report for the Year 2017, rinneadh tástáil ar scór trá Gaeltachta anuraidh agus d’éirigh le 18 acu stádas ‘caighdeán maith’ nó ‘caighdeán den scoth’ a bhaint amach do chaighdeán an uisce.

Trá na bhForbacha agus Trá na mBan ar An Spidéal i nGaeltacht Chonamara an t-aon dá thrá Ghaeltachta nár bhain ar a laghad stádas ‘caighdeán maith’ amach.

In 2017, bhí ar Chomhairle Contae na Gaillimhe comharthaíocht a chrochadh ag trá na bhForbacha ag tabhairt rabhadh don phobal gan snámh ann, ach tá feabhas tagtha ar chaighdeán an uisce de réir na tuarascála is déanaí agus ‘caighdeán sásúil’ tugtha anois don trá sin.

Tugadh an stádas céanna do Thrá na mBan sa Spidéal.

Bhí ‘caighdeán maith’ uisce ann ag trá Chéibh an Spidéil agus bronnadh stádas ‘caighdeán den scoth’ ar na tránna uile eile i nGaeltacht na Gaillimhe a ndearnadh tástáil orthu.

Ba é Trá Phort Arthur sna Doirí Beaga an t-aon trá i nGaeltacht Thír Chonaill nár bhain stádas ‘caighdeán den scoth’ amach. Bhain an trá sin an caighdeán is airde amach le cúpla bliain anuas ach stádas ‘caighdeán maith’ a tugadh di sa tuarascáil is déanaí.

Níl tástáil déanta ar thrá Mhachaire Rabhartaigh agus ar thrá Dhumhaí ach le cúpla bliain anuas, ach deirtear sa tuarascáil gur dócha go mbainfidh siad stádas ‘caighdeán den scoth’ amach an bhliain seo chugainn.

Bhain na tránna uile a ndearnadh tástáil orthu i nGaeltacht Chiarraí agus i nGaeltacht Mhaigh Eo stádas ‘caighdeán den scoth’ amach.

San iomlán, rinneadh tástáil ar 142 trá in Éirinn an bhliain seo caite agus d’éirigh le 132 acu, nó 93%, an bunchaighdeán uisce (‘sásúil’) a bhaint amach. Bhain 72% an stádas ‘caighdeán den scoth’ amach.

Chomh maith leis an bhfiche trá Ghaeltachta a ndearnadh tástáil orthu ó thaobh chaighdeán an uisce snámha, luaitear sé thrá eile sa Ghaeltacht nach dtagann faoi na rialacha maidir le huisce snámha.

Déantar tástáil eile ar an uisce ag na tránna seo ar mhaithe le sláinte an phobail. Bhain cúig cinn de na tránna sin ‘caighdeán den scoth’ amach, ina measc Béal Bán i gCorca Dhuibhne agus Trá na gCaorach in Inis Oírr, agus bhain an ceann eile, An Trá Mhór i nGarmna i gConamara, stádas ‘caighdeán maith’ amach.

Tránna Ghaeltachta a luaitear sa tuarascáil