Tá maoiniú bronnta ag an Rialtas chun ionaid phobail Ghaeltachta ar fud na tíre a fhorbairt agus a uasghrádú.
D’fhógair an Roinn Forbartha Tuaithe agus Pobail maoiniú ón gCiste Infheistíochta d’Ionaid Phobail an tseachtain seo agus beagnach leathmhilliún euro atá le dáileadh ar bhreis is scór coiste i gceantair Ghaeltachta.
Coistí pobail Gaeltachta i nDún na nGall, Gaillimh, Maigh Eo agus an Mhí a bhainfidh leas as an gciste ar fiú €12.5 milliún ar fad é don tír go léir.
Deir an Roinn gurb í seo an infheistíocht aonair is mó a rinneadh in ionaid phobail le blianta fada anuas.
Faoi Chatagóir 1 den chiste, bhí deontais suas le €25,000 míle ar fáil do choistí chun a n-ionad pobail a fhorbairt nó a uasghrádú. Bainfidh coistí áitiúla, cumainn CLG, hallaí paróiste, grúpaí óige agus áiseanna do sheandaoine leas as an maoiniú.
Níos mó ná €450,000 ar fad a bheidh ag dul i dtreo 22 coiste Gaeltachta.
Cúig choiste i nGaeltacht Chonamara a bhí ina measc siúd a fuair an t-uasmhéid a bhí ceadaithe – Comhairle Ceantair na nOileán, Comhairle Mhuintir an Chaisil, Cumann Forbartha na Foirnéise agus Halla na bhForbacha.
Fuair Coiste Forbartha Ceantair Mhín an Aoire agus Coiste Forbartha Éadan Fhionn Fraoich i nDún na nGall deontas €25,000 chomh maith, mar a fuair Comhar Dún Caocháin Teoranta i nGaeltacht Iorrais i Maigh Eo.
Bainfear úsáid as an airgead chun caoi a chur ar dhíonta, insliú a dhéanamh ar ionaid, córais leictreachais a aisfheistiú agus obair eile dá leithéid.
Bronnadh deontais ar 580 grúpa ar fad, idir choistí tuaithe agus choistí i gceantair uirbeacha.
| Dún na nGall | |
|---|---|
| Coiste Forbartha Ceantair Mhín an Aoire | €25,000 |
| Coiste Forbartha an Fháil Charraigh CTR | €12,250 |
| Coiste Forbartha Éadan Fhionn Fraoich | €25,000 |
| Coiste Halla Naomh Bríde | €24,250 |
| Coiste Ionad Pobail Theilinn | €24,970.00 |
| Comharchumann Oileán Árainn Mhór CTR | €17,981.29 |
| Forbairt na Rosann CTR | €24,430.00 |
| Meitheal Mhíobhaigh CTR | €18,822.94 |
| Narin Portnoo Rosbeg Comm Co-Op Soc Ltd | €23,880.00 |
| Pobal Páirtíocht Iardheisceart Dhún na nGall | €10,000.00 |
| Gaillimh | |
| Áras Pobail, Mionlach | €25,000.00 |
| Coiste Forbartha Chorr na Móna | €12,000.00 |
| Comhairle Ceantair na nOileán CTR | €25,000.00 |
| Comhairle Mhuintir an Chaisil CTR | €25,000.00 |
| Comharchumann Forbartha Inis Mór Teo | €17,955.00 |
| Cumann Forbartha na Foirnéise Teo | €25,000.00 |
| Halla na bhForbacha Teo | €25,000.00 |
| Teach na Gaeilge | €17,694.65 |
| Tearmann Éanna | €14,378.01 |
| Maigh Eo | |
| Comhar Dún Caocháin Teoranta | €25,000.00 |
| Comhlacht Pobal Béal Dearg teo | €13,842.00 |
| An Mhí | |
| Coiste na nÓg, Halla Bhaile Ghib | €22,177.00 |
Fág freagra ar 'Breis is €450,000 bronnta ar choistí Gaeltachta chun ionaid phobail a fhorbairt'