Boinn ‘Gaeilge’ le bronnadh ar CLG na Rinne, Laochra Loch Lao agus cumainn eile i bPáirc an Chrócaigh

Bronnfaidh Uachtarán CLG John Horan boinn ar 37 cumann ag ócáid speisialta i bPáirc an Chrócaigh an deireadh seachtaine seo as na hiarrachtaí atá déanta acu an Ghaeilge a chur chun cinn.

Tá an ócáid bhronnta á reáchtáil mar chuid d’Fhondúireacht Sheosaimh Mhic Dhonncha, scéim tacaíochta de chuid Ghlór na nGael agus de chuid Chumann Lúthchleas Gael.

Cuireann an fhondúireacht, atá ainmnithe in ómós iarUachtarán CLG, Seosamh ‘Joe’ Mac Donncha, deontais ar fáil do chumainn atá cláraithe leis an scéim chun gníomhaíochtaí a chuireann an teanga chun cinn a chur i gcrích.

Ghlac 135 club páirt sa scéim i mbliana, ardú 40% ar 2018 agus dúirt Bainisteoir Forbartha Ghlór na nGael, Frainc Mac Cionnaith, go raibh sé an-sásta le líon na gcumann atá ag glacadh páirte.

“Is cúis mhór áthais dúinn go bhfuil na clubanna chomh tiomanta agus chomh díograiseach sin leis an teanga a chothú sa spórt,” arsa Mac Cionnaith.

“Bronnfar a gcéad bhonn ‘Seosamh Mhic Dhonncha’ ar 26 club faoin scéim agus a ndara bonn ar chlubanna eile a fuair bonn anuraidh ach atá i ndiaidh dul chun cinn suntasach a dhéanamh, rud a fhágann go bhfuil leibhéal bonn airgid nó óir bainte amach acu i mbliana.”

Dhá chumann atá tar éis an dul chun cinn sin a dhéanamh, CLG na Rinne (Port Láirge) agus Na Fianna (Baile Átha Cliath). Bronnadh boinn ar an dá chumann sin le cúpla bliain anuas ach tá an leibhéal is airde bainte amach acu i mbliana agus bronnfar boinn óir orthu ag an deireadh seachtaine.

Beidh cumainn as 11 contae i láthair ag an ócáid bhronnta i bPáirc an Chrócaigh. Is as Cúige Uladh formhór na gcumann a bheidh ag fáil aitheantais anocht agus tá 31 club as an 37 lonnaithe sa chúige sin, cumann lánGhaeilge Bhéal Feirste, Laochra Loch Lao, ina measc.

Buaiteoirí:

Bonn Óir:

Na Fianna, CLG, Glas Naíon, Co. Átha Cliath 

CLG na Rinne, An Rinn, Co. Phort Láirge

Bonn Airgid:

Tír na nÓg CLG, Co. Aontroma 

Bun an Phobail CLG, Co. Dhún na nGall 

Toigh Chonnachta, Co. an Dúin 

Naomh Adhamhnáin CLG, Co. Dhún na nGall 

An Chloch Fhada CLG, Co. an Dúin 

CLG Charn Domhnaigh, Co. Dhún na nGall 

CLG Naomh Colum Cille, Oileán agus Cluain, Co. Thír Eoghain 

Bun Cranncha CLG, Co. Dhún na nGall 

Laochra Loch Lao CLG, Co. Aontroma

Bonn Cré-umha:

Cloich Cheann Fhaola, CLG, Co. Dhún na nGall 

Cill Chomáin CLG, Co. Mhaigh Eo 

Micheál Mac Daibhéid CLG, Béal Feirste, Co. Aontroma 

Cumann Liathróid Láimhe  Eanach Cuain, Co. na Gaillimhe 

Naomh Columba CLG, Co. Dhún na nGall 

Uí Chonaill Doire Loinn, Co. Fhear Manach 

Na Cláirseacha CLG, An Chraobh, Co. Thír Eoghain 

An Sean-Phobal CLG, An Sean-Phobal, Co. Phort Láirge 

Na Ceithre Máistir CLG, Co. Dhún na nGall 

Ard Eoin CLG, Co. Aontroma 

Réamoinn Uí hAnluain CLG, Co. Ard Mhacha 

Gleann tSúilí CLG, Co. Dhún na nGall 

Mac Uílín CLG, Co. Aontroma 

An Tulach Mhór CLG, Tulach Mhór, Co. Uíbh Fhailí 

Droim Ga CLG, Co. an Dúin 

An Beart CLG, Co. Dhún na nGall 

Eiméid CLG, Lios Na Scéithe, Co. Fhear Manach 

Naomh Seosamh CLG, Gleann Eallaigh, Co. Thír Eoghain 

Cumann Peile Thomáis Dáibhis, Co. Ard Mhacha 

Cill Náile Brian Ó Bóraimhe CLG, Co. Fhear Manach 

Naomh Éanna CLG, Gleann Ghormlaithe, Co. Aontroma 

Fianna Oileán an Ghuail CLG, Co. Thír Eoghain 

Craobh Rua Camlocha, Co. Ard Mhacha 

Naomh Iosáf CLG, Baile Crann, Co. an Dúin 

Gaeil Leitir Ceanainn CLG, Co. Dhún na nGall 

Naomh Peadar CLG, An Lorgain, Co. Ard Mhacha