Beirt ó chumainn Ghaeltachta na Mí ainmnithe ar shárfhoirne peile agus iomána

Tá áit bainte amach ag beirt imreoirí ó chumainn Ghaeltachta na Mí ar shárfhoirne na bliana a d’ainmnigh Cumann Lúthchleas Gael an tseachtain seo.

Fógraíodh ar maidin go bhfuil an t-imreoir óg ó chumann Bhulf Tón, Adam O’Neill, ainmnithe ar fhoireann na bliana do Chorn Tailteann cúpla lá tar éis d’Éamon Óg Ó Donnchadha ó Chlann na nGael a bheith roghnaithe ar shárfhoireann na n-iománaithe a d’imir i gCoirn Ring, Rackard agus Meaghar i mbliana.

Tá O’Neill ainmnithe mar lánchúlaí ar dheis ar an tsárfhoireann do Chorn Tailteann tar éis dó a bheith mar chuid d’fhoireann na Mí a bhuaigh Corn Tailteann níos luaithe i mbliana. I mbliana a thosaigh an t-ógánach ag imirt le foireann shinsir an chontae ach bhí sé ina dhlúthchuid den fhoireann a thug leo Corn Tailteann agus a chinntigh go mbeidh siad san iomaíocht do Chorn Mhig Uidhir an bhliain seo chugainn.

Fuair foireann na Mí an ceann is fearr ar chontae an Dúin i gcluiche ceannais Chorn Tailteann mí Iúil agus ceathrar ón bhfoireann sin a bhain áit amach ar an tsárfhoireann, chomh maith le fear an ceann ó chontae Aontroma, Ceatharlach agus contae an Chabháin.

Ní i ngeansaí an chontae amháin a bhí O’Neill ag ceiliúradh i mbliana agus é ar fhoireann Bhulf Tón a bhuaigh craobh shinsir Chomórtas Peile na Gaeltachta sna Méillte i nDún na nGall i mí an Mheithimh. D’imir O’Neill sna babhtaí leathcheannais agus sa chluiche ceannais a bhuadar ar Naomh Conaill agus cead aige ó bhainisteoir an chontae, Colm O’Rourke, imirt sa chomórtas Gaeltachta.

Bhí dea-scéal ag Ráth Chairn agus cumann Chlann na nGael sa Mhí freisin an tseachtain seo agus Éamon Óg Ó Donnchadha ainmnithe ar fhoireann na bliana díobh siúd a d’imir i gCoirn Ring, Rackard agus Meaghar.

Thug an Mhí Corn Christy Ring leo den tríú huair nuair a bhuaigh siad ar Dhoire sa chluiche ceannais i bPáirc an Chrócaigh ag tús mhí an Mheithimh. D’aimsigh Ó Donnchadha trí phointe sa chluiche ceannais sin agus é ar dhuine de phríomhscórálaithe na Mí i rith na bliana.

Ainmníodh é mar leatosach ar chlé ar shárfhoireann na bliana agus ceathrar eile ón Mhí ainmnithe ar an bhfoireann sin ina theannta. Imreoirí ó Dhún na nGall, Cill Mhantáin, Doire, Muineachán agus Lancashire atá sa chuid eile ar an bhfoireann.