Bata agus bóthar tugtha ag Manchester United do José Mourinho

Cinneadh fáil réidh le fear na Portaingéile tráth a bhfuil Manchester United 19 pointe taobh thiar dá sean-namhaid Liverpool atá ag barr na Príomhroinne

Bata agus bóthar tugtha ag Manchester United do José Mourinho

Tá bata agus bóthar tugtha ag Manchester United dá mbainisteoir José Mourinho agus gan ach cluiche amháin buaite acu as na sé cinn dheireanacha a bhí acu. 

Tógadh an cinneadh fáil réidh le Mourinho, atá ina bhainisteoir ar an gclub ó Bhealtaine 2016, i ndiaidh don fhoireann cailleadh go bog i gcoinne Liverpool Dé Sathairn, toradh a d’fhág go bhfuil United 19 pointe taobh thiar dá sean-namhaid atá ag barr na Príomhroinne. Tá fíor-dhrochthús curtha ag Manchester United leis an séasúr – an ceann is measa le 28 bliain – agus iad sa séú háit, i bhfad taobh thiar den cheithre fhoireann ar bharr na sraithe. 

I ráiteas a d’eisigh an club inniu, dúradh:

“Tá faoi Manchester United a fhógairt go bhfuil José Mourinho imithe ón gclub ar an toirt.

“Ba mhian leis an gclub buíochas a ghabháil le José as an obair a rinne sé le linn a thréimhse le Manchester United agus gach rath a ghuí air amach anseo. Ceapfar bainisteoir sealadach a bheidh i bhfeighil as seo go deireadh an tséasúir seo, fad is a bheidh an club i mbun próiseas earcaíochta cuimsitheach chun bainisteoir nua lánaimseartha a cheapadh.” 

D’éirigh le Mourinho an tSraith Europa agus Corn na Sraithe a bhuachan in 2016-17 agus bhain an fhoireann an dara háit amach sa Phríomhroinn an séasúr seo caite chomh maith le háit i gcluiche ceannais Chorn an FA. 

Cé gur chaith sé thart ar €400 milliún ar 11 imreoir le linn a thréimhse le United, bhí teannas idir é féin agus feidhmeannas an chlub i mbliana agus Mourinho den tuairim nár tugadh dóthain tacaíochta dó, go háirithe agus é ag iarraidh cosantóir nua a cheannach.

Cé gur mó an locht a chuirfeadh cuid mhór de lucht tacaíochta Manchester United ar na húinéirí agus riarthóirí as an tsáinn ina bhfuil an club ó d’éirigh Alex Ferguson as, bhíothas míshásta chomh maith le cur chuige agus stíl leamh na foirne agus í faoi stiúir Mourinho agus faoin atmaisféar duairc thart ar Old Trafford.

Tá iarbhainisteoir Real Madrid Zinedine Zidane agus bainisteoir Tottenham Hotspur Mauricio Pochettino ina measc siúd atá á lua mar chomharba Mourinho.

Fág freagra ar 'Bata agus bóthar tugtha ag Manchester United do José Mourinho'

  • Tomás

    Cuir síoda ar ghabhar (Manchain Aontaithe) ach is gabhar i gcónaí é. Agus is ceannaithe mar shíoda acu é!

  • Des O Murchu

    Ta na la, nil na la! Ta ManU bxxxed!