Bás 59 duine eile a raibh Covid-19 fógartha ó dheas, nach mór 1,500 básaithe in Éirinn

Dúirt Príomh-Oifigeach Leighis na Roinne Sláinte Tony Holohan tráthnóna dá mba inniu a bhí cinneadh le déanamh maidir leis na srianta dianghlasála go mbeifí ag moladh gan na srianta a scaoileadh

Bás 59 duine eile a raibh Covid-19 fógartha ó dheas, nach mór 1,500 básaithe in Éirinn

Tá bás 59 duine eile a raibh Covid-19 fógartha ó dheas.

Fágann sin gur fógraíodh inniu in Éirinn bás 79 duine eile a bhásaigh de thoradh na paindéime.

Tuairiscíodh níos luaithe gur 20 duine eile le Covid-19 a bhásaigh sa Tuaisceart.

1,488 duine ar a laghad atá básaithe in Éirinn de thoradh na paindéime domhanda, 1,159 duine ó dheas den teorainn agus 329 duine ó thuaidh di.

Beirt de na daoine ó dheas ar tugadh an Covid-19 mar shiocair bháis dóibh roimhe seo, tá sé deimhnithe anois nárbh amhlaidh an scéal.

D’fhógair an Roinn Sláinte ó dheas tráthnóna go raibh 229 cás nua den choróinvíreas deimhnithe, rud a fhágann go bhfuil 23,285 cás den ghalar deimhnithe in Éirinn, 19,877 cás ó dheas agus 3,408 cás ó thuaidh.

Meastar go bhfuil líon na mbásanna ó thuaidh i bhfad níos airde ná 329 ó tharla gur daoine a fhaigheann bás sna hospidéil amháin a chuirtear san áireamh den chuid is mó sna figiúirí laethúla.

153,054 tástáil don ghalar atá déanta ó dheas ó thús na ráige.

Dúirt Príomh-Oifigeach Leighis na Roinne Sláinte Tony Holohan tráthnóna dá mba inniu a bhí cinneadh le déanamh maidir leis na srianta dianghlasála go mbeifí ag moladh gan na srianta a scaoileadh.

Dúirt an Dr Holohan tráthnóna go raibh dul chun cinn á dhéanamh maidir le scaipeadh an ghalair a choinneáil faoi chois ach go gcaithfí coinneáil leis an iarracht a bhí ar siúl.

Dúirt sé arís go raibh na figiúirí maidir le líon na gcásanna nua den ghalar sa phobal agus na figiúirí maidir le líon na ndaoine a bhfuil an galar orthu a bhfuiltear ag déileáil leo sa chóras sláinte fós níos airde ná mar a bhí i gcuid de na tíortha atá tosaithe ar na beartais dianghlasála a scaoileadh.

Luaigh sé go háirithe cás na dtithe altranais agus na n-ionad cúraim eile.

Baineann 680 de líon iomlán na mbásanna ó dheas, nó 59% le tithe altranais agus ionaid chúraim eile.

Meastar gur beag maolú a dhéanfar ar na srianta an tseachtain seo chugainn d’ainneoin go bhfuiltear ag súil go mbeidh feabhas an tseachtain seo ar an ráta ionfhabhtaithe, agus laghdú ar an líon daoine a chuirfidh an galar in ospidéal nó den saol.

Meastar go síneofar orduithe nua an deireadh seachtaine seo chugainn a cheadóidh leanúint le formhór mór na srianta dianghlasála.

Tuairiscítear go raibh an dá léamh ag airí ag cruinniú rialtais an lae inniu maidir le ceist scaoileadh na srianta dianglasála.

 

Fág freagra ar 'Bás 59 duine eile a raibh Covid-19 fógartha ó dheas, nach mór 1,500 básaithe in Éirinn'

  • Maitiú Ó Murchú

    An gciallaíonn ó dheas an Phoblacht? Má chiallaíonn sé – scríobh sin, le bhur dtoil in áit an mhíchruinnis.