An Taoiseach chun díospóireacht a lorg faoi reachtaíocht teanga le linn Sheachtain na Gaeilge

Ach níor thug sé aon fhreagra ar an gceist a chuir Gerry Adams air faoi cé acu an nglacfaí nó nach nglacfaí leis na moltaí a d’fhoilsigh coiste Oireachtais inné maidir le na leasuithe atá le déanamh ar an Acht Teanga

13/1/2015. Ireland Foreign Policy Reviews
Pictiúr: Photocall Ireland

Tá an Taoiseach chun labhairt leis an bPríomhaoire féachaint an bhféadfaí díospóireacht a shocrú le linn Sheachtain na Gaeilge faoin leasú atá le déanamh ar Acht na dTeangacha Oifgiúla.

Thug an Taoiseach, Enda Kenny, an méid sin le fios sa Dáil inniu agus é ag freagairt ceiste ó cheannaire Shinn Féin, Gerry Adams, faoin 34 moladh a d’fhoilsigh coiste Oireachtais inné i dtaobh na leasuithe atá le déanamh ar an Acht Teanga.

16/12/2014. Gerry Adams Dail Scenes
Pictiúr: Photocall Ireland

“Maidir leis an gceist a cuireadh orm faoi Bhille na dTeangacha oifigiúla, sílim go mbeadh sé oiriúnach dá mbeadh díospóireacht anseo i rith Sheachtain na Gaeilge. Beidh mé ag caint leist leis an bPríomhaoire faoi sin. Foilseofar an Bille sin sa seisiún seo freisin,” a dúirt an Taoiseach.

Níor thug sé aon fhreagra ar an gceist a chuir Gerry Adams air faoi cé acu an nglacfaí leis na moltaí a foilsíodh inné.

Chuir Gerry Adams agus Sinn Féin fáilte roimh na moltaí.

“Foilsíodh an tuarascáil inné agus chuir Sinn Féin fáilte roimhe. Is rud an-mhaith é an tuarascáil seo. Tá 34 moladh ann a chuireann béim ar sheirbhísí do phobal na Gaeilge a chur ar fáil agus a chosaint. An nglacfaidh an Taoiseach agus an tAire leis na moltaí seo? Níos tábhachtaí fós, an bhfuil an Taoiseach sásta díospóireacht a chur ar siúl ar an ábhar seo anseo sa Dáil le linn Seachtain na Gaeilge?,” a d’fhiafraigh Teachta Dála Shinn Féin, Gerry Adams.