‘An Fáinne’ le caitheamh ag oibrithe traenach le cumas sa Ghaeilge a léiriú do phaisinéirí

Tá sé i gceist ag Iarnród Éireann ‘An Fáinne’, an suaitheantas aitheanta lena dtugtar le fios go bhfuil Gaeilge ag an té atá á chaitheamh, a úsáid le cainteoirí Gaeilge i measc na foirne a chur in iúl do phaisinéirí

Deir Iarnród Éireann go bhfuil mar “phríomhsprioc” acu timpeallacht “ina dtabharfar le fios go gcuirtear fáilte roimh Ghaeilge” a chruthú ar bord thraenacha an chomhlachta.

Dúirt urlabhraí de chuid an chomhlachta iarnróid le Tuairisc go bhfuil Iarnród Éireann “ag obair i gcomhpháirtíocht le Conradh na Gaeilge” le tionscnamh an Fháinne a “leathadh amach” tríd an gcomhlacht. Deir an comhlacht go léireoidh an Fáinne “cumas teanga agus oscailteacht” i measc na foirne an Ghaeilge a labhairt le paisinéirí ar na traenacha.

Is mar gheall ar an togra nua seo atá an suirbhé faoin nGaeilge a sheol Iarnród Éireann an tseachtain seo caite á reáchtáil.

“D’fhorbair muid suirbhé chun aiseolas agus moltaí a bhailiú ón bpobal faoi conas is féidir linn feabhas a chur ar úsáid agus feiceálacht na Gaeilge agus conas is féidir linn daoine a chur ar a gcompord chun a gcuid Gaeilge a úsáid ar ár seirbhísí.

“Ós rud é go n-úsáideann an oiread sin daoine an córas iompair poiblí gach lá, áit a bhféadfadh siad teacht ar an nGaeilge, tá sé mar phríomhsprioc ag Iarnród Éireann timpeallacht ionchuimsitheach a chruthú, ina dtabharfar le fios go gcuirtear fáilte roimh an nGaeilge ann,” a dúirt an t-urlabhraí le Tuairisc.

Dúradh go raibh an comhlacht iompair poiblí “tiomanta do ról na Gaeilge a neartú ar fud na heagraíochta” agus sna seirbhísí a chuireann siad ar fáil. Maíodh freisin go raibh Iarnród Éireann ag tacú leis an bhfoireann “laistigh den eagraíocht” a gcuid Gaeilge a fheabhsú agus go raibh ranganna Gaeilge á gcur ar fáil don fhoireann.

Dúirt an t-urlabhraí gur mhaith le hIarnród Éireann níos mó ná na dualgais teanga atá ar an eagraíocht faoi Acht na dTeangacha Oifigiúla a chomhlíonadh agus “cuidiú ar bhealach fóinteach le cur chun cinn agus normalú na Gaeilge sa saol laethúil”.

Tá suirbhé á dhéanamh i láthair na huaire ag Iarnród Éireann ar chainteoirí Gaeilge a bhíonn ag úsáid seirbhísí traenach an chomhlachta. Tá ceisteanna sa suirbhé faoi na mothúcháin a bhíonn ag paisinéirí na dtraenacha ar chloisteáil na Gaeilge ar na seirbhísí iarnróid dóibh, faoi cé chomh compordach is a bhíonn cainteoirí Gaeilge agus ag labhairt na teanga “lena gcairde agus a muintir” agus le “strainséirí”.