“Comhtharlúint” amach is amach atá ann go bhfuil an ceol céanna á úsáid ar fhógra ag iarraidh daoine a spreagadh chun infheistíocht a dhéanamh sa Chasacstáin agus a bhíonn le cloisteáil gach oíche ar Nuacht TG4.
Bíonn an fógra ‘Invest in Kazakhstan’, a chuirfeadh meangadh aithne ar lucht féachana Nuacht TG4, le feiscint ar Euronews faoi láthair.
Tá an fógra á chraoladh mar chuid d’fheachtas atá á reáchtáil ag Rialtas Kazakhstan d’fhonn na suáilcí a bhaineann le hairgead a infheistiú sa tír sin a chur ar a súile do lucht infheistíochta.
Dúirt Joe Reddington, Leas-Phríomheagarthóir Nuacht TG4, le Tuairisc.ie gurbh é an rannóg graificí a roghnaigh an ceol aitheantais atá ag Nuacht TG4 timpeall dhá bhliain ó shin, agus go bhfuil bainistíocht an chláir “an-sásta” leis an rogha “tarraingteach” a deineadh.
“Comhtharlúint” a bhí ann gur chosúil gur cheannaigh na Casacstánaigh ceadúnas don cheol céanna dá bhfógra, a dúirt sé.
“Léiríonn sé go bhfuil an cumas céanna ag muintir na Casacstáine ceol maith a aithint agus a roghnú is atá againn anseo!” a dúirt Joe Reddington.
Fág freagra ar 'An ceol céanna ag Nuacht TG4 agus rialtas na Casacstáine'