Gach bliain bíonn na fadhbanna céanna ag imreoirí clubanna ar fud na tíre, is é sin an easpa cluichí agus cluichí a bheith á gcur ar ceal go rómhinic ar fad. Tá sé thar a bheith dian ar na bainisteoirí club. Rómhinic bíonn an bainisteoir ag pleanáil agus ag ullmhú i gcomhair lá éigin agus ansin gan aon choinne leis, seachtain roimhe, cuirtear an cluiche ar ceal.
Uaireanta cuirtear an cluiche céanna siar arís ina dhiaidh sin. Tá sé thar a bheith dian ar na himreoirí chomh maith.
Anuraidh rinneadh cinneadh cothrom na Féinne a thabhairt do na clubanna (bhuel, rinneadh cinneadh, ar pháipéar). Socraíodh máistirliosta de shórt a chur ar fáil do cluichí club ach faraor níor oibrigh an plean rómhaith, go háirithe an socrú mí Aibreán go léir a fhágáil ag na clubanna.
Ní dóigh liom go bhfuil aon bhaol ann go mbeidh cluichí club i ngach contae san Aibreán i mbliana ach an oiread.
An bhfuil aon mheas in aon chor ar imreoirí na gclubanna? Deir Cumann Lúthchleas Gael go bhfuil, ach chun a bheith macánta faoi, is í mo thuairim féin nach bhfuil mórán measa orthu.
Tá daoine áirithe taobh istigh de CLG gur mó a meas ar chúrsaí airgeadais ná ar imreoirí na gclubanna.
Nuair a bunaíodh cumann na n-imreoirí club cúpla bliain ó shin tugadh dóchas éigin do na clubanna agus tá tús curtha le cás an imreora club a bhrú chun tosaigh.
Tá cúpla contae tar éis cinneadh a dhéanamh gan comórtais na gclubanna a thosú go dtí go mbeidh an fhoireann shinsir críochnaithe.
Anseo i gCorcaigh coicís ó shin, fógraíodh trí mholadh nua a bhí le cur faoi bhráid chlubanna uile an chontae.
B’fhéidir go bhfuilim ag dul thar fóir nuair a deirim go raibh sé ina raic an tseachtain a raibh ar na clubanna cinneadh a dhéanamh faoin cén rogha ab fhearr leo. Is cinnte go raibh mórán comhrá, argóintí agus tuairimí láidre faoin ábhar. Trí mholadh dhifriúla a bhí i gceist. Ba é Moladh 3 go n-imreofaí na cluichí i mí Bealtaine agus mí Meitheamh, d’uireasa na n-imreoirí contae. B’in an moladh ba mhó a tharraing caint is easaontas. Bhí mórán le plé sna moltaí agus tugadh seans do na clubanna go léir sa chontae a dtodhchaí a phleanáil.
Bhí go dtí Dé Máirt seo caite ag na clubanna chun a gcinneadh a dhéanamh maidir le cén moladh a cheap siadsan ab fhearr a d’oirfeadh do na comórtais agus do na himreoirí club sa chontae. Labhair an GPA amach i gcoinne mholadh a trí. Thacaigh cuid maith daoine ar na meáin shóisialta leis an moladh agus cháin cuid mhaith eile é.
Ach ag cruinniú bhord an chontae Dé Máirt, i ndiaidh cuid mhaith cainte, bhí vóta faoi na moltaí agus ba é a thoradh sin gur socraíodh nach rachadh an contae leis an rogha ‘núicléach’. Glacadh le Moladh A a chinnteoidh go mbeidh cluiche club amháin san Aibreán (mar atá faoi láthair) agus dhá cluiche i mí Lúnasa. Beidh níos mó cluichí ina dhiaidh sin ag an dream a théann tríd.
I ndeireadh na dála chloíodar leis an status quo. Is beag difríocht idir an moladh seo agus an plean a bhí acu anuraidh. Beidh athruithe ar struchtúir áirithe i gceist: beidh na foirne ag imirt i ngrúpaí ar dtús agus comórtas díbeartha a bheidh ann ina dhiaidh sin go dtí na babhtaí deireanacha.
Rinne an Bord, faoi stiúir an phríomhfheidhmeannaigh nua Kevin O’Donovan, cinneadh deis a thabhairt do na clubanna ar fad, idir bheag agus mhór, a dtuairimí a thabhairt agus a vóta a caitheamh.
Tá an fheadóg séidte anois agus tiocfaidh an leagan amach nua seo i bhfeidhm an séasúr seo chugainn.
Fág freagra ar 'An bhfuil aon mheas in aon chor ar imreoirí na gclubanna?'