Ábhair á múineadh trí Bhéarla ar Inis Oírr den chéad uair riamh cheal múinteoirí cáilithe

Múinfear ábhair trí Bhéarla i gColáiste Ghobnait Inis Oírr den chéad uair riamh toisc gur chinn ar an scoil Ghaeltachta teacht ar mhúinteoirí a bhí ábalta múineadh trí Ghaeilge.

Dúirt príomhoide Choláiste Ghobnait, Bríd Ní Dhonnacha, gur deacrachtaí a bhaineann le múinteoirí a fháil chun dul ag obair ar oileáin is cúis leis an scoil a bheith ag iompú ar an mBéarla in ábhair áirithe.

Dúirt Ní Dhonnacha ar Adhmhaidin ar Raidió na Gaeltachta inniu go raibh sé “thar am” an liúntas speisialta a bhíodh ann do mhúinteoirí ar oileáin a thabhairt ar ais. Dúirt sí gur gá é sin mar go mbíonn costas breise ar dhaoine a bhíonn ag teagasc ar oileáin agus gur minic, mar shampla, go mbíonn morgáiste ag múinteoirí ar tír mór agus cíos á íoc acu ar an oileán.

Amárach a chuirfear tús leis an scoilbhliain nua i gColáiste Ghobnait agus deir lucht na scoile nach bhfuil aon rogha acu ach ábhair áirithe á múineadh trí Bhéarla den chéad uair riamh. I measc na n-ábhar sin, tá an Mhatamaitic, an Ealaín agus an Eacnamaíocht Bhaile.

23 dalta a beidh ag freastal ar Choláiste Ghobnait i mbliana, laghdú ar an 28 dalta a bhí ann anuraidh.

Maidir leis an gceathrar múinteoirí nua a earcaíodh do Choláiste Ghobnait i mbliana, dúirt Bríd Ní Dhonncha gur gá don Roinn Oideachais tacaíocht bhreise a chur ar fáil dóibh.

“Níl aon chóras tacaíochta ar fáil do na múinteoirí atá earcaithe againn. Tá siad toilteanach agus tá siad sásta an Ghaeilge a fhoghlaim ach níl aon struchtúr ceart i bhfeidhm,” ar sí.

Dúirt Ní Dhonncha go raibh “leatrom” á dhéanamh ar dhaltaí an oileáin agus go bhfuil na daltaí sin i dteideal “an caighdeán oideachais céanna” a fháil le gach scoláire eile sa tír.

D’fhoilsigh an Comhchoiste Oireachtais um Oideachas agus Scileanna tuarascáil i mbliana maidir le scoileanna oileáin, tuarascáil ina raibh ocht moladh.

Moladh sa tuarascáil go dtabharfaí ar ais an liúntas oileáin a d’íoctaí le múinteoirí a bhíonn ag teagasc i scoileanna oileáin, go dtabharfaí €20,000 sa bhliain do gach iarbhunscoil oileáin agus go dtabharfaí breis foirne do na scoileanna sin chun freastal ar a sainriachtanais ó thaobh an oideachais. Moladh chomh maith go bhféachfadh an tAire Oideachais ar chur le líon na scoláireachtaí atá ceadaithe do dhaltaí le tréimhsí a chaitheamh ar scoileanna na n-oileán agus go gcuirfí  deireadh leis an mbac atá ar dhaltaí Gaeltachta leas a bhaint as na scoláireachtaí sin.

Moladh chomh maith go bhforbrófaí “sainpholasaí a dhíreodh ar shainriachtanais scoileanna oileáin” agus go n-aithneofaí cás na scoileanna oileáin in aon reachtaíocht, polasaithe nó tionscnaimh de chuid na Roinne Oideachais agus Scileanna amach anseo.