Cé go bhfuil na ceithre Chúige ag réiteach do na cluichí deiridh i réamhbhabhtaí Chorn na gCuradh an tséasúir seo, tá formhór an scéil againn cheana féin.
Fiú agus cluiche le himirt acu inniu i gcoinne Treviso, tá a fhios againn go bhfuil Cúige Laighean cinnte dá n-áit sna cluichí ceathrú ceannais. Go deimhin tá fir Átha Cliath chomh fada sin chun cinn ar na foirne eile i nGrúpa A go bhfuil siad cinnte go mbeidh buntáiste an bhaile acu sna cluichí ceathrú ceannais.
Ní féidir áit sna cluichí ceathrú ceannais a chur as an áireamh do na hUltaigh ach oiread, go háirithe agus iad ag tabhairt faoi Bath, foireann nár bhuaigh oiread agus cluiche amháin féin i gcomórtas na bliana se,. Níor cheart go mbeadh aon stró ar fhoireann Bhéal Feirste sa gcoimhlint seo agus iad sa mbaile inniu.
Sin deireadh leis na dea-scéalta, faraor.
Amárach i Luimneach, tabharfaidh na Muimhnigh faoi na hOspreys, foireann eile nár bhuaigh aon chluiche sa gcomórtas fós. Ní dóigh go mbeidh mórán deacrachtaí ag foireann an bhaile an lá a thabhairt leo sa gcoimhlint seo ach ní fios fós an leor sin le háit sna cluichí ceathrú ceannais a chinntiú dóibh. Braitheann sin ar thoradh an chluiche idir na Saracens, foireann a bheas ag imirt sa mbaile i gcoinne Racing 92. Má bhíonn an bua ag Saracens nó fiú má bhíonn siad ar comhscór le Racing, is acu a bheas an dara háit sa ngrúpa. Sa gcás sin beidh deireadh le hiarrachtaí na Muimhneach sa gcomórtas seo.
Ní féidir le Cúige Mumhan tada a dhéanamh ag an tráth seo ach bua le pointe bónais a fháil agus a bheith ag guí go mbeidh an bua ag Racing.
Maidir leis na Connachtaigh, a bheas ag imirt in Montpellier amárach, fiú má éiríonn leo na cúig phointe atá ar fáil sa gcluiche seo a shlánú ní bheidh acu ach trí phointe dhéag.Tá ceithre phointe dhéag slánaithe cheana féin ag Gloucester, atá sa dara háit agus cluiche fós le himirt acu siúd, rud a chiallaíonn go mbeidh na Connachtaigh ar an ngannchuid, fiú roimh thús Bhabhta 6.
Tá rás na gConnachtach sa gcomórtas seo rite.
Is dona liom a rá nach féidir aon athrú a chur ar an bhfíric sin anois.
Fág freagra ar 'A gcúram déanta ag Cúige Laighean cheana ach Cúige Mumhan beo ar éigean'