44 duine eile a raibh Covid-19 orthu básaithe ó dheas, os cionn 700 bás deimhnithe in Éirinn

706 duine ar a laghad atá básaithe in Éirinn faoin tráth seo de thoradh na paindéime, 530 duine ó dheas den teorainn agus 176 duine ó thuaidh di

44 duine eile a raibh Covid-19 orthu básaithe ó dheas, os cionn 700 bás deimhnithe in Éirinn

Tá 44 duine eile a raibh Covid-19 orthu básaithe ó dheas.

Fógraíodh 62 bás ar fad in Éirinn inniu.

Tuairiscíodh níos túisce inniu go raibh 18 duine eile a bhí buailte ag Covid-19 básaithe in ospidéil an Tuaiscirt.

706 duine ar a laghad atá básaithe in Éirinn faoin tráth seo de thoradh na paindéime, 530 duine ó dheas den teorainn agus 176 duine ó thuaidh di.

709 cás nua den ghalar a deimhníodh ó dheas tráthnóna, rud a fhágann go bhfuil 16, 318 cás anois in Éirinn, 13,980 ó dheas agus 2,338 ó thuaidh.

San oirthear a bhí 33 de na daoine is déanaí a bhásaigh ó dheas, bhí triúr san iarthuaisceart, triúr sa deisceart na tíre agus in iarthar na tíre a bhí an cúigear eile.

19 ban agus 25 fear a bhí i gceist agus an aois mheánach a bhí acu ná 84.

Bhí fadhbanna sláinte eile ag 25 acu.

Maidir leis an 530 bás ó dheas go dtí seo, 83 bliain d’aois an aois mheánach a bhí acu. 308 fear agus 222 bean a bhí i gceist. Bhí an duine is óige a bhásaigh 23 bliain d’aois agus bhí an duine is sine 105 bliain d’aois.

Fógraíodh chomh maith tráthnóna go bhfuil sé i gceist 100,000 tástáil don ghalar a dhéanamh in aghaidh na seachtaine ar feadh sé mhí ar a laghad agus tabharfar tús áite as seo go ceann deich lá do thástáil a chur ar gach duine atá ina gcónaí nó ag obair in ionaid fhadchónaithe.

D’fhéadfadh líon na marbh sa Tuaisceart a bheith i bhfad níos airde ná mar atá á thuairisciú.

De réir eolais a chuir Gníomhaireacht Thuaisceart Éireann um Staidreamh agus um Thaighde (Nisra) amach inniu d’fhéadfadh líon na mbásanna a bheith aon trian níos airde ná mar atá á thuairisciú.

D’fhéadfadh 39 bás níos mó ná mar a tuairiscíodh a bheith ann de réir fhigiúirí Ghníomhaireacht Thuaisceart Éireann um Staidreamh agus um Thaighde (Nisra), a bhfuil briseadh síos ar líon na mbásanna de bharr Covid-19 foilsithe den chéad uair acu.

157 bás de bharr Covid-19 a bhí ar an taifead ag NISRA faoin 10 Aibreán, 109 bás san ospidéal, 41 bás in ionaid chúraim agus seacht mbás ag baile.

118 bás a thuairiscigh an Gníomhaireacht Sláinte Phoiblí don tréimhse chéanna. Ach oiread leis an mBreatain, básanna san ospidéal amháin a chuireann na húdaráis sláinte ó thuaidh san áireamh.

Dúirt LeasChéad-Aire an Tuaiscirt Michelle O’Neill gur léiriú níos cruinne staitisticí nua Nisra ar “scála na paindéime sa phobal”.

Pictiúr: Sam Boal/RollingNews.ie

Dheimhnigh Feidhmeannacht na Seirbhíse Sláinte inniu gur bhásaigh aon duine dhéag in aon teach altranais amháin i mBaile Átha Cliath le coicís anuas.

Bhí toradh dearfach ar an tástáil do Covid-19 a bhí faighte ag deichniúr de na daoine a bhásaigh in Ospidéal Naomh Muire i bPáirc an Fhionnuisce agus meastar go raibh Covid-19 ar an duine eile a bhásaigh le linn na tréimhse céanna ón 2 Aibreán i leith.

Tá áit do nach mór 200 duine san ionad cónaithe ina ndéantar cúram do dhaoine atá amach sna blianta.

Is é cás Ospidéal Naomh Muire an léiriú is déanaí ar chruachás na n-ionad cónaithe agus cúraim a bhfuil “géarchéim náisiúnta” tugtha air.

Dúirt Ollamh Emeritus de chuid Rannóg na Sláinte Poiblí agus na hEipidéimeolaíochta i gColáiste Ríoga na Lianna, Ruairí Brugha,  gur chóir gur áiteanna cluthar sábháilte a bheadh i dtithe altranais ach gurb amhlaidh gur “neadacha ionfhabhtuithe” iad.

Dúirt an tOllamh Brugha ar Morning Ireland gur scéal “duairc tragóideach” a bhí i scéal na n-ionad cónaithe. 

355 ionad cúraim sa Stát atá buailte ag an gcoróinvíreas, agus tithe altranais is ea 196 acusan.

Ionaid phríobháideacha a bhí i 186 den 355 ionad agus bhain 112 acu leis an HSE. Ionaid chúraim eile a fhaigheann a maoiniú go léir nó cuid de ón Stát a bhí i 28 ionad eile. Ionaid de chineál eile a bhí i naoi gcinn.

San oirthear a bhí an chuid is mó de na hionaid a buaileadh ach bhí neart acu sa Ghaillimh agus i Maigh Eo chomh maith. 16 ionad a buaileadh sa Ghaillimh agus 14 a buaileadh i Maigh Eo.

De réir na bhfigiúirí is déanaí, den 487 bás a tuairiscíodh ó dheas ó thús na ráige Covid-19, bhain 302 acu, nó 62%, le daoine a bhí i dtithe altranais nó ionaid chúraim eile. 253 acu a bhain le tithe altranais, nó 55%.

Agus an HSE ag iarraidh dul i ngleic leis an ngéarchéim sna hionaid chúraim, táthar le hoibrithe sláinte a aistriú go dtí áiteanna a bhfuil gá leo, táthar le tástáil don ghalar a chur ar gach duine atá ina gcónaí sna hionaid agus cuirfear PPE agus trealamh breise eile ar fáil.

Idir an dá linn, d’fhéadfadh líon na marbh sa Tuaisceart a bheith i bhfad níos airde ná mar atá á thuairisciú.

Fág freagra ar '44 duine eile a raibh Covid-19 orthu básaithe ó dheas, os cionn 700 bás deimhnithe in Éirinn'