397 cás nua fógartha, imní faoin ardú ar líon na n-othar sna hospidéil

397 cás eile den choróinvíreas a d’fhógair an Roinn Sláinte tráthnóna.

54 othar atá buailte ag an ngalar atá sna hospidéil agus tá 16 acusan in aonad dianchúraim.

Deir NPHET gur údar imní dóibh an t-ardú atá ag teacht ar líon na n-othar sna hospidéil le roinnt laethanta anuas. Triúr sa bhreis a cuireadh sna hospidéil leis an Covid-19 le 24 uair an chloig anuas agus beirt sa bhreis atá ag fáil cúraim in aonad dianchúraim le lá anuas.

“Tá ardú beag ach ardú ar údar imní é ar líon na ndaoine a bhfuil cúram ospidéil de dhíth orthu le laethanta beaga anuas, sin 10-14 lá ó thosaigh an meanlíon cásanna ag ardú. Údar imní é seo agus coinneoidh muid súl ghéar air sna laethanta agus sna seachtainí seo romhainn,” a dúirt an Dr Tony Holohan, Príomhoifigeach Leighis na Roinne Sláinte.

Tá sé ráite ag an Aire Iompair Eamon Ryan go mbeidh Teastas Digiteach Covid an AE á chur ar fáil d’aon duine ag a bhfuil an vacsaín iomlán faighte.  Dúirt an tAire go seolfaí an teastas chuig 1.8 milliún duine, ag tosú an tseachtain seo chugainn. Aon duine a chláraigh ar shuíomh chlár vacsaínithe Fheidhmeannacht na Seirbhíse Slainte, gheobhaidh sé nó sí an teastas ar ríomhphost agus gheobhaidh daoine a fuair an tsnáthaid óna ndochtúir teaghlaigh sa phost é. Beidh cód a bheidh le scanadh ar an bhfón cliste sa litir.

Dúirt an Tánaiste Leo Varadkar ar Nuacht RTÉ go gcuirfí ionad glaonna ar fáil le cuidiú le daoine a mbeidh aon cheisteanna acu mar gur dóigh go mbeadh “pianta fáis’ ag an gcóras. Mheabhraigh an Tánaiste do dhaoine go mbeadh moill i gceist leis an taisteal agus go mbeadh tástáil PCR “ag teastáil le filleadh abhaile”.

Agus Teastas Digiteach an Aontais Eorpaigh ag duine, beidh sé níos éasca an taisteal idirnáisiúnta neamhriachtanach a chur ar bun arís ón 19 Iúil ach tá caint ann go mbainfí leas as freisin leis an tseirbhís bia agus dí faoi dhíon a cheadú arís.

Más duine thú a raibh an Covid-19 ort caithfidh tú deimhniú a fháil ó shaotharlann gurbh amhlaidh an cás chomh maith le toradh diúltach ar thástáil PCR más leat an tír a fhágáil.

As seo go dtí an 19 Iúil, ní bheidh aon athrú ar an gcomhairle sláinte phoiblí, a deir an Tánaiste, sin le rá nár chóir d’aon duine nach bhfuil an vacsaín iomlán faighte acu nó nár tholg an Covid-19 dul thar sáile.

Dúirt an tAire Iompair go raibh súil aige moltaí a chur faoi bhráid an Rialtais Dé Máirt seo chugainn faoi úsáid na dteastas digiteach in earnáil an fháilteachais.

Tá breis is 4.4 milliún snáthaid tugtha do dhaoine sa tír seo anois.

Ón lá amárach ar aghaidh féadfaidh daoine atá idir 30 agus 34 bliain d’aois clárú ar shuíomh an HSE chun ceann de na vacsaíní mRNA (Moderna nó Pfizer) a fháil. Ceaptar go bhfuil thart ar 800,00 duine idir 18 agus 34 atá ag fanacht ar vacsaín.

Ón lá inné tá cead ag daoine idir 18 agus 34 bliain leo clárú lena gcógaslann agus vacsaín Janssen a fháil agus ní theastaíonn ach snáthaid amháin. Ar ndóigh braitheann sin ar an soláthar a bheidh ag an gcógaslann.

Tá snáthaid amháin faighte ag 69% de dhaoine fásta na tíre agus tá an cúrsa iomlán faighte ag os cionn leath díobh.

D’fhógair Roinn Sláinte Thuaisceart Éireann inniu go raibh 417 cás nua den ghalar deimhnithe ansin. Fógraíodh nach raibh aon duine eile básaithe ansin de dheasca an víris le 24 uair an chloig.

37 othar Covid-19 atá in ospidéil an Tuaiscirt agus tá cúigear acusan in aonad dianchúraim. Tuairiscíodh go bhfuil ráigeanna den ghalar i gcúig cinn d’ionaid chúraim i dTuaisceart Éireann.

Tá an chéad dáileog den vacsaín faighte ag 1,175,151 duine sa Tuaisceart agus tá an dara dáileog faighte ag 904,607.