Tá fógartha ag an Roinn Sláinte go bhfuil 27 duine eile a raibh Covid-19 orthu básaithe.
1,856 duine ar a laghad atá básaithe in Éirinn ó thús na ráige, 1,429 ó dheas den teorainn agus 427 ó thuaidh di.
Duine amháin ó dheas ar tugadh an Covid-19 mar shiocair bháis dó roimhe seo, tá sé deimhnithe anois nárbh amhlaidh an scéal.
Deimhníodh 156 cás nua tráthnóna, rud a fhágann gur 26,563 cás den ghalar Covid-19 atá deimhnithe go dtí seo in Éirinn, 22,541 cás ó dheas agus 4,022 cás ó thuaidh.
Fógraíodh bás cúigear eile de dheasca Covid-19 sa Tuaisceart inniu.
De réir eolais a chuir Gníomhaireacht Thuaisceart Éireann um Staidreamh agus um Thaighde (Nisra) amach inniu tá líon na mbásanna ó thuaidh a i bhfad níos airde ná 422.
516 bás de bharr Covid-19 a bhí ar an taifead ag NISRA faoin 1 Bealtaine. 383 bás a thuairiscigh an Roinn Sláinte don tréimhse chéanna.
Básanna sna ospidéil amháin den chuid is mó a fhógraíonn an Roinn Sláinte sa Tuaisceart ach cuireann NISRA san áireamh gach cás ina bhfuil Covid-19 luaite mar shoiocair báis ar theastas báis.
Maidir leis 516 bás de bharr Covid-19 a bhí ar an taifead ag NISRA faoin 1 Bealtaine, bhain 232 acu, nó 45%, le 66 teach altranais nó ionad cúraim eile agus bhain 253 nó 49% acu leis na hospidéil.
D’fhoisigh NPHET chomh maith inniu eolas nua faoi aois na ndaoine le Covid-19 a bhásaigh ó dheas ó thús na ráige.
Briseadh síos ar líon na gcásanna agus na mbásanna go dtí seo
| Aoisghrúpa | Cásanna | Básanna |
| 0-4 | 120 | |
| 5-9 | 108 | |
| 10-14 | 145 | |
| 15-19 | 357 | * |
| 20-24 | 1,226 | * |
| 25-29 | 1,719 | * |
| 30-34 | 1,970 | * |
| 35-39 | 1,944 | 6 |
| 40-44 | 1,981 | * |
| 45-49 | 2,171 | 9 |
| 50-54 | 1,949 | 13 |
| 55-59 | 1,707 | 30 |
| 60-64 | 1,262 | 25 |
| 65-69 | 771 | 69 |
| 70-74 | 910 | 128 |
| 75-79 | 974 | 180 |
| 80-84 | 1,241 | 304 |
| 85+ | 2,329 | 652 |
| Ní fios | 31 | * |
| Iomlán | 22,915 | 1,429 |
Nóta: Ar mhaithe le rúndacht othar tá * curtha ag an Roinn Sláinte in áit líon na mbásanna san áit go raibh níos lú ná cúig bhás i gceist
D’fhógair an Fhoireann Náisiúnta um Éigeandáil sa tSláinte Phoiblí (NPHET) baint éigin le hionad cúraim ag 899 den 1,429 duine a bhásaigh de bharr an ghalair go n-uige seo ó dheas, nó 63%. Ardú eile a bhí ansin. Bhain 777 de na cásanna sin, nó 54% acu, le tithe altranais.
Fágann sin gur bhain beagnach beirt as gach triúr a bhásaigh ó thús na ráige le teach altranais nó le hionad cúraim eile.
Maidin inniu, 74 duine a raibh Covid-19 orthu a bhí sna haonaid dianchúraim ó dheas, beirt níos lú ná mar a bhí iontu maidin inné agus níos lú othar ná mar a bhí in ICU aon lá ó tháinig na srianta isteach ag deireadh mhí an Mhárta.
Dúirt Príomh-Oifigeach Leighis na Roinne Sláinte, an Dr Tony Holohan, tráthnóna go raibh an cinneadh scrúduithe na hArdteiste a chur ar ceal ag teacht leis an gcomhairle faoin tsláinte poiblí.
Dúirt sé nach ndearna NPHET aon mholadh díreach maidir leis na scrúduithe.
Maidir le na scoileanna a bheith ag oscailt i mí Mhéan Fómhair, dhéanfaí cinneadh faoi sin lá níos faide anonn ag brath ar an dul chun cinn san fheachtas i gcoinne an choróinvíris, a dúirt an Dr Holohan.
Idir an dá linn, is í an Iodáil anois an tríú háit ar domhan inar bhásaigh níos mó ná 30,000 duine de thoradh na paindéime.
Fógraíodh 243 bás nua san Iodáil, i gcomparáid le 274 an lá roimhe.
An Bhreatain agus Stáit Aontaithe Mheiriceá an dá áit eile a bhfuil níos mó ná 30,000 duine curtha den saol iontu ag Covid-19.
Fág freagra ar '27 duine eile a raibh Covid-19 orthu básaithe, baint ag dhá thrian de bhásanna le hionaid chúraim'