Tráchtaireacht i nGaeilge ar Chluichí Leathcheannais agus Ceannais na hÉireann ar RTÉ 1

Pat Fleury agus Dara Ó Cinnéide a bheidh i mbun na hanailíse i dteannta an tráchtaire Garry Mac Donncha

Tráchtaireacht i nGaeilge ar Chluichí Leathcheannais agus Ceannais na hÉireann ar RTÉ 1

Tá sonraí curtha amach ag RTÉ 1 maidir leis an tráchtaireacht Ghaeilge a chuirfear ar fáil do chluichí leathcheannais agus ceannais peile agus iomána na hÉireann.

Beidh lucht féachana RTÉ 1 ar Saorview agus ar Sky in ann tráchtaireacht i nGaeilge a roghnú do chluichí móra CLG na bliana seo, idir pheil agus iomáint. 

Is é Pat Fleury, a bhí ina chaptaen ar Uíbh Fhailí nuair a thug siad leo craobh iománaíochta na hÉireann i 1985, a bheidh mar chomhthráctaire le Garry Mac Donncha do na cluichí iomána agus beidh Dara Ó Cinnéide, a bhí ina chaptaen ar fhoireann caide Chiarraí a bhuaigh craobh na bliana 2004, a bheidh le Mac Donncha do na cluichí leathcheannais agus ceannais peile.

Dúirt Rónán Mac Con Iomaire, Grúpcheannasaí Gaeilge, RTÉ go rabhthas “thar a bheith sásta” leis an nglacadh a bhí leis an tráchtaireacht Ghaeilge a cuireadh ar fáil do na cluichí ceannais anuraidh.

“Is léiriú maith é ar thiomantas RTÉ i leith chraoltóireacht na Gaeilge go bhfuil muid in ann cur leis an tseirbhís sin i mbliana agus tráchtaireacht Ghaeilge a chur ar fáil do cheithre chluiche breise CLG, gan trácht ar cluichí sacair na hÉireann le linn Chraobh na hEorpa le gairid,” a dúirt Mac Con Iomaire.

Tá na sonraí maidir le conas teacht ar an tráchtaireacht Ghaeilge do mhórchluichí iomána agus peile an tsamhraidh curtha ar fáil inniu chomh maith ag RTÉ:

Saorview:

Roghnaigh Language-Irish-OK

Sky: 

Brúigh Help – Switch Audio Description OFF

Ar an gcianrialtán, brúigh Services – System Setup [nó Options] – Language&Subtitles [nó Accessibility] – Favorite Language (roghnaigh Irish) – Save New Settings.

Téigh ar ais ag Help agus cas Switch Audio Description go dtí ON.

Níl an tseirbhís Ghaeilge ar fáil ar chóras Virgin faoi láthair.