Súil siar ar chraoltóireacht na Gaeilge roimh theacht TG4 le Micheál Ó Sé — sraith nua ag tosú anocht

Is é an craoltóir as Ard na Caithne i nGaeltacht Chorca Dhuibhne a bheidh i mbun reacaireachta ar an gclár nua Ar an Aer ina mbreathnófar ar an tuairisciú a rinneadh ar shaol na Gaeilge agus na Gaeltachta sula raibh stáisiún teilifíse Gaeilge ann

Súil siar ar chraoltóireacht na Gaeilge roimh theacht TG4 le Micheál Ó Sé — sraith nua ag tosú anocht

Cuirfear tús anocht le sraith nua cartlainne ar TG4 ina mbreathnófar siar ar chraoltóireacht na Gaeilge ó theacht na teilifíse go teacht TG4 os cionn 20 bliain ó shin.

Is é an craoltóir Micheál Ó Sé as Ard na Caithne i nGaeltacht Chorca Dhuibhne a bheidh i mbun reacaireachta ar an gclár nua Ar an Aer. Rinne an comhlacht Sibéal Teo, atá lonnaithe sa Daingean, an clár, atá á chraoladh mar chuid de chomóradh 20 bliain TG4.

“Is súil siar ar shaol na Gaeilge agus na Gaeltachta sna blianta roimh theacht TG4 atá ann, nuair a bhí an tuairisciú sin á dhéanamh ar stáisiúin eile. Tá muid ag breathnú ar céard a bhí ag tarlú sa Ghaeltacht agus cén saghas tuairisciú a bhí á dhéanamh air.

Óige Ghaoth Dobhair sna 1970idí

“Craolfar ocht gclár thar dhá mhí agus beidh téamaí éagsúla ag baint le gach clár. Ar chlár na hoíche anocht, cuir i gcás, ‘Teacht agus Imeacht’ an téama a bheidh leis agus beidh muid ag plé le daoine a d’imigh ar imirce ón nGaeltacht go háiteanna eile — muintir Chonamara i Boston sna 80idí agus muintir Chiarraí i Londain sna 70idí agus araile,” a dúirt Niamh Ní Bhaoill, léiritheoir na sraithe le Tuairisc.ie.

Beidh míreanna nuachta agus míreanna as cláir Ghaeilge eile a craoladh i gcaitheamh na mblianta ó tosaíodh ar an gcraoladh teilifíse in Éirinn ar dtús os cionn 50 bliain ó shin le feiceáil ar an gclár agus na scéalta á sníomh le chéile ag Ó Sé.

Dúirt Ní Bhaoill le Tuairisc.ie go mbeidh idir scéalta áthais agus scéalta bróin le feiceáil le linn na sraithe, agus thagair sí do dhá scéal a bheidh ar chlár na hoíche anocht.

Páistí i Maigh Eo sna 1970idí

“Beidh mír ann faoin eastát tionsclaíochta i nGaoth Dobhair a tógadh sna 1970idí. Bhí go leor d’aos óg an cheantair imithe ar imirce go hAlbain agus tíortha eile an t-am sin, ach mheall an t-eastát nua abhaile iad agus thug siad leo a gclann. Bhí rath ar na scoileanna agus daoine óga sa cheantar arís. Tá agallamh sa mhír sin le cailín óg a rugadh i Nua-Eabhrac ach a tháinig ar ais go Gaoth Dobhair agus Gaeilge líofa aici.

“Ar an láimh eile, tá scéal ann faoi bhean as Maigh Eo a mbíodh a fear céile ag obair i Sasana ar feadh na bliana agus a chaitheadh aimsir na Nollag léi sula n-imíodh sé arís. Bhí deichniúr clainne orthu agus an uile dhuine acu sin ar imirce i Sasana freisin,” a dúirt sí.

Bean óg as Ciarraí a bhí ar imirce i Sasana sna 1960idí

Beidh an tsraith Ar An Aer le feiceáil ar TG4 gach Céadaoin as seo go ceann dhá mhí.

Beidh dhá shraith eile ó Shibéal Teo le feiceáil ar TG4 sna seachtainí amach romhainn freisin – sraith nua Béaloideas Beo agus sraith nua Sé Mo Laoch.

Pléifear nósanna agus piseoga an adhlactha, na n-éan, an phortaigh agus an t-iliomad ábhar eile sa tríú sraith seo den chlár béaloidis agus seanchais a bheidh á chraoladh idir seo agus mí Aibreáin, agus beidh leithéidí Mary Bergin, Seán Keane, Ann Mulqueen agus Antóin Mac Gabhann faoi chaibidil ar Sé Mo Laoch.

Breandán Ó hEithir, a chuir go leor clár Gaeilge i láthair ar theilifís na hÉireann roimh theacht TG4