Seán Ó Coinn molta ag Bord Fhoras na Gaeilge do phost an Phríomh-Fheidhmeannaigh

Tá Seán Ó Coinn, Stiúrthóir Seirbhísí Oideachais Fhoras na Gaeilge, molta ag Bord an Fhorais le teacht i gcomharbacht ar Ferdie Mac an Fhailigh mar Phríomhfheidhmeannach Fhoras na Gaeilge. Moladh Ó Coinn ag cruinniú de chuid Bhord an Fhorais ar an 4 Samhain. Ba é Ó Coinn ba mhó a bhí á lua leis an […]

Seán Ó Coinn molta ag Bord Fhoras na Gaeilge do phost an Phríomh-Fheidhmeannaigh

Tá Seán Ó Coinn, Stiúrthóir Seirbhísí Oideachais Fhoras na Gaeilge, molta ag Bord an Fhorais le teacht i gcomharbacht ar Ferdie Mac an Fhailigh mar Phríomhfheidhmeannach Fhoras na Gaeilge.

Moladh Ó Coinn ag cruinniú de chuid Bhord an Fhorais ar an 4 Samhain. Ba é Ó Coinn ba mhó a bhí á lua leis an bhfolúntas don phost is sinsearaí san eagraíocht teanga trasteorann ó fógraíodh go mbeadh Mac an Fhailigh ag éirí as níos luaithe i mbliana.

Dúirt Ó Coinn go bhfuil “bród as cuimse” air a bheith ainmnithe ag an mBord.

“Tá bród as cuimse orm as an mhuinín atá léirithe ag Bord Fhoras na Gaeilge ionam inniu. Is pribhléid mhór é a bheith ag teacht sna sála ar bheirt Phríomhfheidhmeannach a tháinig romham, Ferdie Mac an Fhailigh agus Seosamh Mac Donncha,” a dúirt sé.

Tá meas ar Ó Coinn, arb as an Mullach Bán, i gContae Ard Mhacha dó, laistigh den Fhoras féin agus thuill sé meas eagraíochtaí teanga deonacha le linn na hidirbheartaíochta suaite casta fadálach maidir le ‘cuíchóiriú’ earnáil na Gaeilge.

Bhíodh Ó Coinn ina Phríomhfheidhmeannach ar Chomhairle na Gaelscolaíochta, an foras forbartha Gaelscolaíochta ó thuaidh. Ceapadh ina Stiúrthóir Seirbhísí Oideachais i bhForas na Gaeilge i mí Mheán Fómhair 2011.

Tá céim onórach aige sa Léann Ceilteach ó Ollscoil na Banríona agus dioplóma sa Bhainistíocht ó Ollscoil Uladh. Sular thosaigh ag obair leis an bhForas, d’oibrigh Ó Coinn mar mhúinteoir meánscoile agus mar láithreoir ar BBC Raidió Uladh. Chaith sé tamall i mbun taighde in Ollscoil na Banríona ar logainmneacha Thuaisceart Éireann.

Bhí Ferdie Mac an Fhailigh ina Phríomhfheidhmeannach ar Fhoras na Gaeilge ó mhí Dheireadh Fómhair 2006.

Conradh cúig bliana agus tuarastal nach mór €115,000 sa bhliain atá luaite leis post an Phríomh-Fheidhmeannaigh, a fógraíodh i mí Lúnasa.

I measc na dtréithe atá “riachtanach” don phost tá “ardinniúlacht sa Ghaeilge”, “tiomantas don teanga” agus taithí bhainistíochta agus cheannaireachta ag leibhéal sinsearach.