Níl aon chinneadh déanta fós maidir le ceapachán Stiúrthóir na Gaeilge nua i Roinn na Gaeltachta.
Thug an tAire Gaeltachta Joe McHugh le fios an tseachtain seo go raibh “roghanna” fós á plé i gcás an fholúntais don státseirbhíseach is sinsearaí a bhíonn ag plé go buan le polasaí teanga an Stáit.
Ba i dtús mhí Dheireadh Fómhair a chéadtuairiscíodh go raibh Stiúrthóir na Gaeilge i Roinn na Gaeltachta, Máire Killoran, ag éirí as a cúram chun tabhairt faoi phost i Lucsamburg mar Stiúrthóir ar an Ionad Aistriúcháin do Chomhlachtaí an Aontais Eorpaigh.
Ní fios go fóill, áfach, cé acu an líonfar an folúntas nó an gcinnfear cúramaí an stiúrthóra a leagan ar Rúnaí Cúnta.
D’fhéadfadh chomh maith gur i ndiaidh thoghchán na bliana seo chugainn a dhéanfaí an cinneadh.
Bheadh a fhios an uair sin an mbeadh aon athrú le déanamh ar struchtúr na roinne a bhfuil cúraimí na Gaeilge agus na Gaeltachta faoi láthair uirthi.
Ní fios go fóill ach an oiread an comórtas inmheánach nó comórtas seachtrach a bheadh i gceist sa chás go mbeadh Stiúrthóir nua le ceapadh.
Sa chás nach gceapfaí éinne mar Stiúrthóir na Gaeilge, d’fhéadfaí cúram na Gaeilge a chur faoi dhuine de na Rúnaithe Cúnta atá ag plé le réimsí eile d’obair na Roinne Ealaíon, Oidhreachta agus Gaeltachta agus a bhfuil Gaeilge ar a dtoil acu.
Sa chás go reáchtálfaí comórtas inmheánach don fholúntas, bheadh deis ag éinne ag grád Príomh-Oifigigh sa státseirbhís dul san iomaíocht, fad is a bheadh Gaeilge acu.
Dá gceadófaí comórtas seachtrach, bheadh cead ag daoine lasmuigh den státseirbhís cur isteach chomh maith ar an bpost.
Agus ceist Dála faoin bhfolúntas á freagairt aige an tseachtain seo, dúirt Aire Stáit na Gaeltachta Joe McHugh go raibh “na roghanna sa chás seo á meas faoi láthair” agus go ndéanfaí cinneadh “go luath, i gcomhairle leis an Roinn Caiteachais Phoiblí agus Athchóirithe”.
Bhí an tAire McHugh ag freagairt ceiste ón Teachta Dála Éamon Ó Cuív.
Jake MacSiacais
Go n-éirí le Máire sa Lucsamburg.