Réalta ‘Game of Thrones’ ina ambasadóir do Sheachtain na Gaeilge

Tá Art Parkinson, nó Rickon Stark ó Game of Thrones mar is fearr aithne air, le bheith ina ambasadóir don fhéile idirnáisiúnta teanga a bheidh ar siúl i mí an Mhárta

Réalta ‘Game of Thrones’ ina ambasadóir do Sheachtain na Gaeilge

 

Tá Art Parkinson, a bhfuil cáil bainte amach aige ar fud an domhain as a ról sa tsraith iomráiteach Game of Thrones mar Riocán Stairc, ainmnithe ina ambasadóir do Sheachtain na Gaeilge 2017.

Tá Parkinson, 15, ar dhuine de na hambasadóirí is óige a bhí ag Seachtain na Gaeilge riamh, ach tá sé ar dhuine de na daoine is cáiliúla a bhí sa ról freisin.

Is as Bun an Phobail in Inis Eoghain i dTír Chonaill é Parkinson, a bhí le feiceáil den chéad uair ar Game of Thrones agus gan é ach naoi mbliana d’aois.

Is cainteoir líofa Gaeilge é, a fuair a chuid bunscolaíochta i nGaelscoil Cois Feabhail. Bhí teagascóir aige, Ruairí Mac Mánais as Béal Feirste, agus é ag taisteal ar fud na cruinne dá ról i ndráma HBO, agus is i nGaeilge a bhí an teagasc a fuair sé.

Tá sé anois ag freastal ar Choláiste Chineál Eoghain i mBun Cranncha.

Dúirt Julian de Spáinn, Ard-Rúnaí Chonradh na Gaeilge, le Tuairisc.ie go bhfuil an eagraíocht “thar a bheith sásta” gur ghlac Parkinson leis an gcuireadh a bheith ina ambasadóir don fhéile.

“Tá an fógra teilifíse taifeadta cheana féin aige agus tá muid thar a bheith sásta leis sin. Tá Art é féin an-sásta a bheith páirteach i Seachtain na Gaeilge. Is cainteoir líofa Gaeilge é, a d’fhreastail ar scoil lán-Ghaeilge agus atá anois ina aisteoir mór le rá,” a dúirt de Spáinn.

Ghlac Parkinson páirt i bhfeachtas dhá bhliain ó shin le Coláiste Chineál Eoghain a choinneáil oscailte. Is é Coláiste Chineál Eoghain an t-aon iarbhunscoil lán-Ghaeilge in Inis Eoghain, agus bhí sí i mbaol a dúnta in 2015 de bharr a laghad daltaí a bhí sa scoil.

Labhair Parkinson, a bhí 13 bliain d’aois ag an am, amach faoin ngéarchéim ina scoil agus dúirt nár mhaith leis féin an Gaeloideachas a fhágáil ina dhiaidh ná an turas dhá uair an chloig a dhéanamh le freastal ar an scoil lán-Ghaeilge ba ghaire dó.

Ainmneofar beirt ambasadóirí eile don fhéile idirnáisiúnta teanga sna seachtainí amach romhainn. Beidh Seachtain na Gaeilge ar siúl ón 1-17 Márta 2017 agus tá imeachtaí beartaithe ag lucht eagraithe na féile ar fud na hÉireann agus thar lear.