An Drúcht Geal Ceo
Ag gabháil síos an ghleann dom féin cois na gcrann,
Go dtí’n chathair aoibhinn shuairc,
Bhí na sluaite teann leis na mílte lann,
Ag teacht aníos gan ghruaim,
Ní raibh crónán caoin as béalaibh píob,
Ná drumaí ag tógáil gleo,
Ach an chlog go glinn ag cur fáilte bhinn,
Roimh an Aingeal ins an drúcht geal ceo.
II
Chroch siad in airde a mbrat go hard,
Os cionn Chaisleán Bhaile Átha Cliath,
Níor ní leo bás a fháil ag Saddle Bar, [Sedd el Bahr]
Agus Éire ina ndiaidh i bpian,
As lár na Mí sé a ghluais an scaoth,
De na laochra líofa beo,
Agus sluaite Gall ag bualadh anall,
A gcuid gunnaí ins an drúcht geal ceo.
III
Chuaigh an ghrian a luí agus thit an oíche,
Ach níor ísligh an comhrac teann,
Bhí na tinte ’dó ag na Gaeil go fóill,
Is ag dealramh ar thaobh na lann,
Bhí gach duine ’guí nach mealladh a chroí
As an teagmháil thréan go deo,
Ach le beannú an lae bhí a mbrat gan bheám
Ag croitheadh ins an drúcht geal ceol.
IV
’Sé plúr na laoch a thit faraor i mbriseadh crua na Cáisc
Is d’fhág siad sinn go croí tinn
Ag éagaoin faoina mbás
Bhí súile an tsaoil ag breathnú an gníomh
’Rinne clann na nGael san gleo
Na leoin a d’éag faoi sholas glé ghil
Faoi shaoirse ins an drúcht geal ceo.
V
Ar shiúl mar chadhain mo chreach is mo léan
Tá na céadtaí curtha crua,
Tá a gcnámha sínte ag Sola’n tSín [Salonika]
Nó faoi chósta na mara ó thuaidh
Dá bhfaigheadh siad bás sa bhaile ar lár
Le Piaras tá inniu sa ghlór
Bheadh a n-uaigh faoin sliabh i measc na bhFiann
Mar a scaipeann an drúcht geal ceo
VI
Chuaigh mé síos an gleann arís
Agus mo chroí bocht lán de bhrón
Is mé scartha choíche ó phlúr na laoch
Nach bhfeicfinn arís níos mó
I lár na hoíche bímse ’guí
Le mo chónaí a bheith sa ghlór
Do ruaig sibh an tráill a fheara Fáil
Nuair a thit sibh ins an drúcht geal ceo
Bailitheoir: Seán P. Ó Gallchobhair, Áth na gCoire, Anagaire, Co Dhún na nGall
