Nach deas é? Nach mór an carghas é!

Mír rialta ó scríbhneoirí éagsúla faoi nathanna cainte a thugann léargas ar shaibhreas, ar shaíocht agus ar aclaíocht na teanga

Nach deas é? Nach mór an carghas é!

D’fhéadfadh cantal a bheith ort faoin tráth seo más amhlaidh an bheadaíocht sin uilig is ansa leat a bheith crosta agat ort féin ar mhaithe leis an anam nó leis an gcolainn. Seantraidisiún an carghas a dhéanamh ar rud a mbeadh dúil agat ann ach d’úsáidtí an focal carghas freisin agus gan an séanadh ná an troscadh a bheith i gceist leis. 

Tá siad ann nach carghas leo rud ar bith, chuile rud sciobtha leo chun a leasa féin acu agus chuile mhian á sásamh.  Ní ligfeadh an carghas dó scaradh le luach a bhéile, nuair is sprionlaitheacht seachas aithrí a bheadh á spreagadh. Chuirfeadh an bhail a bhí ar an gcréatúr carghas ort nuair is brón agus briseadh croí atá i gceist. 

Is carghas liom scaradh leis an ngadhar seo ach ós tú féin atá ann, croch leat é!

Nach mór an carghas é! Nach deas é?