Imreoidh Rory McIlroy taobh le Hideki Matsuyama na Seapáine agus an Spáinneach Jon Rahm agus an t-Éireannach ag iarraidh Comórtas Oscailte Gailf na hÉireann a bhuachan den dara bliain as a chéile.
Tá Matsuyama, atá sa dara háit i rangú an domhain faoi láthair, agus Rahm ar bheirt de na himreoirí idirnáisiúnta is aitheanta i gcomórtas na bliana seo agus cuirfidh siad féin agus McIlroy tús lena mbabhtaí ag 1.20i.n. tráthnóna Déardaoin.
Is i bPort Stíobhaird, Co. Dhoire, atá an Irish Open á reáchtáil i mbliana, an tríú huair le cúig bliana anuas go bhfuil an comórtas á imirt i gCúige Uladh.
Agus an Irish Open 2016 buaite aige sa K Club, is é McIlroy rogha na coitiantachta chun comórtas na bliana seo a bhuachan ach ní raibh sé i mbarr a mhaitheasa go dtí seo i mbliana de bharr gortuithe agus malairt maidí a bheith á n-úsáid aige. Ní bhíonn sé ar a chompord ach oiread ar ghalfchúrsaí dumhcha amhail Port Stíobhaird.
Níos luaithe maidin Déardaoin a chuirfidh Shane Lowry, Graeme McDowell agus Pádraig Harrington tús lena gcomórtas. Is ag 8.10r.n. a thosóidh Lowry agus é ag imirt in aon ghrúpa le Thomas Pieters agus Rafa Cabrera Bello. Deich nóiméad ina dhiaidh sin, ag 8.20r.n. rachaidh McDowell, Tommy Fleetwood agus Justin Rose amach. Is le beirt Eorpach a bheidh Harrington chomh maith agus é ag dul amach in éineacht le Miguel Angel Jimenez agus Andy Sullivan ag 8.30i.n..
Seachtar déag Éireannach atá ag glacadh páirt sa chomórtas san iomlán.
I measc na ngrúpaí mór le rá eile, tá grúpa uile-Shasanach ina mbeidh Danny Willett, Matt Fitzpatrick agus Ian Poulter páirteach ann.
Is féidir na grúpaí uile a fheiceáil anseo.
Fág freagra ar 'Matsuyama agus Rahm in éineacht le McIlroy don chéad dá bhabhta den Irish Open'