Mac an tSíthigh ceaptha mar Bhainisteoir Chomharchumann Chorca Dhuibhne

Dónal Mac an tSíthigh, ó Bhaile na hEaglaise, tagtha i gcomharbacht ar Ghearóid Ó Brosnacháin mar bhainisteoir

Donal Sheehy

Is é Dónal Mac an tSíthigh atá ceaptha ina Bhainisteoir ar Chomharchumann Forbartha Chorca Dhuibhne.

Tagann Mac an tSíthigh, ó Bhaile na hEaglaise, Paróiste an Fheirtéaraigh, ó dhúchas, i gcomharbacht ar Ghearóid Ó Brosnacháin a thug 25 bliain leis an gcomharchumann.

Tá deich mbliana tugtha ag Mac an tSíthigh féin ag obair do Chomharchumann Forbartha Chorca Dhuibhne agus é ina Bhainisteoir Gréasáin na Meán Skillnet. Thug an Sítheach tamall ag obair d’Údarás na Gaeltachta roimhe sin agus tá céim sa chumarsáid agus gnó aige.

Mac é Dónal le Gearóid agus Patsy. Tá deirfiúr agus deartháir amháin aige, Siobhán agus Seán, an t-iriseoir aitheanta ó Nuacht RTÉ. Tá sé pósta le Maria Curran ón nDaingean agus cónaí orthu i mBaile na Buaile.

Nia é leis an scríbhneoir iomráiteach Danny Mac an tSíthigh.

Is in iomairí an oideachais agus na hoiliúna is mó a bhíonn Comharchumann Forbartha Chorca Dhuibhne ag saothrú agus is é bainistiú na gcoláistí samhraidh a reáchtálann Coláistí Chorca Dhuibhne an cúram is mó a bheidh ar Mhac an tSítigh. Tagann Oidhreacht Chorca Dhuibhne, Músaem Chorca Dhuibhne, an comhlacht léiriúcháin, Dovinia Teoranta agus South West Gnó Skillnet faoi scáth an chomharchumainn chomh maith.