Leithscéal gafa ag buamadóir de chuid an IRA faoi bhuamáil Birmingham

Tá fear a dhéanadh buamaí don IRA le linn na dTrioblóidí tar éis leithscéal a ghabháil as bheith páirteach sa ghrúpa a bhuamáil tithe tábhairne in Birmingham in eachtra inar maraíodh 21 duine i 1974.

Pléascadh buamaí in dhá theach tábhairne in Birmingham ar an 21 Samhain 1974. Ciontaíodh seisear, ar a dtugtar ‘Seisear Birmingham’, san éagóir mar gheall ar an mbuamáil.

Tá leithscéal gafa anois ag Michael Christopher Hayes, atá ag cur faoi anois i mBaile Átha Cliath, as an mbaint a bhí aige leis an ngrúpa a d’eagraigh an bhuamáil sa Mulberry Bush agus sa Tavern in the Town.

In agallamh a thug sé don BBC NI, dúirt Hayes gur theastaigh uaidh dearcadh rannpháirtí sa bhuamáil a thabhairt. Mhaígh sé nach raibh sé i gceist ag an IRA daoine a mharú agus gur thug siad rabhadh leathuair a chloig do phóilíní Shasana faoi na buamaí, ach go raibh moill ocht nóiméad ar na póilíní an rabhadh sin a eisiúint, rud ba chúis leis an léirscrios.

San agallamh, admhaíonn Hayes gur bhain sé féin an dochar as an tríú buama nuair a chuala an IRA faoin ár a rinneadh sa dá áit eile. Is ar Hagley Road in Birmingham a bhí an tríú buama sin fágtha.

Bhí Hayes ar dhuine den bheirt a ainmníodh as na buamaí a leagan in Birmingham, ar chlár de chuid Granada TV a craoladh i 1990. Dúirt sé san agallamh, a chraolfar anocht, gur ghabh na póilíní é, gur ceistíodh é agus gur scaoileadh saor é i 1974.

Dúirt Hayes go raibh “comhfhreagracht” á glacadh aige as gníomhartha uilig an IRA i Sasana, buamáil Birmingham ina measc. D’adhmaigh sé go raibh sé ina bhall den IRA ar feadh breis agus 30 bliain in Éirinn agus i Sasana agus go raibh páirt aige i ngníomhartha na heagraíochta in Birmingham.

Dhiúltaigh sé scun scan a rá ar leag sé féin buama agus dúirt nach raibh “faic le rá” aige nuair a cuireadh an cheist sin air.

Dhiúltaigh sé freisin ainmneacha na ndaoine a leag na buamaí a thabhairt mar gurbh fhearr leis “bás a fháil ná a bheith [ina] sceithire”. Dúirt sé go raibh a choinsias glan agus nach aon dúnmharfóir é féin.

Níor ghlac gaolta na marbh lena leithscéal, ag rá gur “leithscéal meata  agus cladhartha” a bhí ann. Dúirt Julie Hambleton, ar maraíodh a deirfiúr Maxine (18) sa phléasc, nach raibh ann ach “cladhaire” agus go mbeadh aon leithscéal ón IRA “maslach”.