Gradam buaite ag clár TG4 faoi agóid in aghaidh na Cinedheighilte san Afraic Theas

Seo an dara huair as a chéile ar bhuaigh clár a rinneadh do TG4 príomhdhuais Radharc, gradam cuimhneacháin ar scannánóirí na sraithe ‘Radharc’

Gradam buaite ag clár TG4 faoi agóid in aghaidh na Cinedheighilte san Afraic Theas

Tá Gradam Radharc, buaite ag an gclár faisnéise Torthaí na Daoirse a craoladh ar TG4.

Clár é Torthaí na Daoirse faoin stailc i siopaí Dunnes Stores sa bhliain 1984 mar agóid in aghaidh pholasaithe na Cinedheighilte san Afraic Theas.

Dhiúltaigh Mary Manning, oibrí 21 bliain d’aois a bhí ag obair i Dunnes Stores Shráid Anraí i mBaile Átha Cliath, oráistí Outspan ón Afraic Theas a láimhseáil i mí Iúil na bliana sin. Nuair a cuireadh Manning agus an deichniúr eile a sheas léi ar fionraí, tosaíodh an stailc.

Seo an dara huair as a chéile ar bhuaigh clár a rinneadh do TG4 príomhdhuais Radharc, gradam cuimhneacháin ar scannánóirí na sraithe ‘Radharc’ a chraoltaí ar RTÉ ó 1961 go 1996. Sagairt a bhí sa mheitheal a sholáthair an tsraith Radharc, na céadta clár faisnéise ar cheisteanna conspóideacha ó gach cearn den tír agus den domhan.

Dúirt Leas-Cheannasaí TG4 Pádhraic Ó Ciardha ar Nuacht TG4 gur “mór ag TG4” an gradam iomráiteach a bheith buaite ag an stáisiún faoi dhó.