Craobh Faoi 21 buaite den chúigiú huair ag Gaoth Dobhair
Lá ar bith a n-aimsíonn foireann 25 pointe ón imirt, an-seans go mbuafaidh siad agus b’in díreach a tharla i gcás pheileadóirí Ghaoth Dobhair agus nuair a bhuaigh siad Craobh Faoi 21 Dhún na nGall ar an Luan.
Scóráil siad 2-19 san iomlán agus gach scór acu sin ag teacht ón imirt. B’in a ndóthain chun bua sé phointe a thabhairt dóibh in aghaidh Aodha Ruadh sa chluiche ceannais i bPáirc Mhic Chumhaill.
Ba iad Aodh Ruadh a bhí chun cinn ag leath ama, 2-8 in aghaidh 1-9, agus ba iad Colm Kelly agus David McGurrin a d’aimsigh na cúil d’fhoireann Bhéal Átha Seanaidh sa chéad leath sin. Michael Carroll a fuair cúl Ghaoth Dobhair agus bhí tionchar ar leith aige ar an teacht aniar a rinne a fhoireann sa dara leath.
Bhí an bhearna laghdaithe acu go dtí aon phointe amháin go luath i ndiaidh an bhrisidh ach bháigh Éamonn McGrath cúl eile san eangach chun farasbarr Aodha Ruadh a mhéadú arís. Mhúscail an cúl sin buachaillí Ghaoth Dobhair áfach agus bhí smacht iomlán ar an imirt acu as sin go deireadh an chluiche.
D’aimsigh siad sé phointe as a chéile chun dul chun tosaigh ar a gcéilí comhraic agus faoin am ar scóráil Odhrán Ferry-McFadden an dara cúl do Ghaoth Dobhair in am gortuithe, bhí an bua deimhnithe cheana féin acu.
An Daingean ina ríthe ar Chiarraí Thiar arís
Ba iad an Daingean a thug an svae leo i gcath na gcomharsan idir iad féin agus an Ghaeltacht, 0-18 i gcoinne 1-13.
Cé nach raibh ach dhá phointe ag scaradh na bhfoirne ag deireadh na himeartha, ba ag an Daingean a bhí forlámhas ó thús deireadh. Bhí siad seacht bpointe chun cinn agus ceann scríbe beagnach sroichte agus cé gur aimsigh an Ghaeltacht 1-2 sa chúpla nóiméad deireanach (Éanna Ó Conchúir a scóráil an cúl), ní raibh an Daingean riamh i mbaol.
B’iad ab fhearr a chuir tús leis an gcluiche agus an triúr Geaney, Conor, Mikey agus Paul, a d’aimsigh na scóranna chun an Daingean a chur trí phointe chun cinn, 0-3 in aghaidh 0-0, agus gan ach deich nóiméad imeartha. D’fhág Dara Ó Sé na Gaeltachta a lorg ar chlár na scór go luath ina dhiaidh sin, ach bhí na scóranna ag teacht níos saoráidí d’fhir an Daingin agus an bhearna méadaithe acu go dtí sé phointe, 0-11 in aghaidh 0-5, ag leath ama.
Laghdaigh pointí ó Dhara Ó Sé agus Seán M. Ó Conchúir an bhearna don Ghaeltacht luath sa dara leath ach ní raibh siad riamh in ann preab a bhaint as an Daingean. Bhí an Ghaeltacht ag brath an iomarca ar Sheán M. Ó Conchúir agus Éanna Ó Conchúir chun deiseanna a chruthú agus nuair a d’aimsigh Paul Geaney, Tomás Mac an tSíthigh, Conor Geaney agus Cathal Ó Bambaire tuilleadh pointí don Daingean ag teannadh le deireadh an chluiche, bhí farasbarr acu a d’fhág go raibh siad ar a gcompord, fiú nuair a chuir an Ghaeltacht críoch láidir leis an gcluiche.
Cliseadh tubaisteach do pheileadóirí Mhícheál Breathnach
Agus nóiméad d’am gortuithe imeartha i gcluiche ceannais Chraobh Faoi 21 B na Gaillimhe an Domhnach seo caite, bhreathnaigh sé go raibh an beart déanta ag cumann Micheál Breathnach agus iad trí phointe chun cinn ar Chathair Loistreáin i bPáirc an Phiarsaigh. Ní hamhlaidh a bhí ach ba é an briseadh croí a bhí i ndán d’fhir Indreabháin agus teacht aniar dochreidte i ndán do Chathair Loistreáin san am a bhí fágtha.
D’aimsigh Kevin Nally cúl gleoite chun na foirne a thabhairt ar comhscór sular aimsigh Gary O’Neill agus Conor Faulkner na pointí a chinntigh an bua d’fhoireann thuaisceart na Gaillimhe, 1-17 in aghaidh 2-11.
Ba dhrochbhuille é do na Breathnaigh mar ba ar éigean a d’fhéadfaí na foirne a scaradh i rith an 60 nóiméad. Cothrom a bhí siad ag leath ama, 1-5 in aghaidh 0-8, Dara Mac Gearailt ag aimsiú cúl d’fhoireann Chois Fharraige ó chic éirice, agus nuair a d’aimsigh Brian Ó Maoileoin cúl eile dóibh ag tús an dara leath, bhí cuma na maitheasa orthu.
Fiú nuair a tháing Cathair Loistreáin ar ais ó na buillí sin chun an scór a chothromú, chuaigh Micheál Breathnach chun cinn arís agus d’aimsigh siad trí phointe as a chéile sna deich nóiméad deireanach. B’in an uair a cuireadh tús le haiséirí a gcéilí comhraic.
