FÍSÉAN: Tá Vincent Browne ag foghlaim na Gaeilge…

D’fhreastail Browne le déanaí ar chúrsa Gaeilge de chuid Oidhreacht Chorca Dhuibhne i mBaile an Fheirtéaraigh

FÍSÉAN: Tá Vincent Browne ag foghlaim na Gaeilge…

Baineadh siar as an láithreoir teilifíse aitheanta Vincent Browne le linn a chláir cúrsaí reatha ar TV3 aréir, nuair a d’iompaigh an Teachta Dála neamhspleách Catherine Connolly ar an nGaeilge chun comhghairdeas a dhéanamh leis as a bheith ag foghlaim na teanga.

D’fhreastail Browne ar chúrsa Gaeilge i gCorca Dhuibhne i gcaitheamh an tsamhraidh agus labhair an Teachta Dála as Gaillimh Thiar Gaeilge leis nuair a chuir sé fáilte roimpi go dtí clár na hoíche aréir.

“Bhuel, i dtús báire comhghairdeachas, chuala mé go raibh tú ag foghlaim na Gaeilge agus fáilte ar ais,” a dúirt an Teachta Dála.

“Bhí mé. Go raibh maith agat,” a dúirt an láithreoir.

D’fhreastail Browne ar chúrsa seachtaine Gaeilge de chuid Oidhreacht Chorca Dhuibhne i mBaile an Fheirtéaraigh i mí Iúil.

Cé go bhfuil de theist ar an iriseoir go mbíonn cur chuige ionsaitheach, neamhghéilliúil aige agus polaiteoirí á gceistiú aige, is cosúil gur scoláire ciúin díograiseach é.

“Duine uasal é. Bhí gach aoinne ana-thógtha leis. Is air siúd a bhí daoine ag cur na gcruacheisteanna!,” a dúirt urlabhraí ó Oidhreacht Chorca Dhuibhne le Tuairisc.ie.

Tá ráite cheana ag Browne go raibh Gaeilge mhaith aige tráth agus gurbh í an Ghaeilge an t-ábhar ab fhearr ar scoil aige. Chaith sé tamall ag foghlaim na Gaeilge chomh maith i nGaeltacht na Rinne le linn a óige.

Dúirt an t-urlabhraí ó Oidhreacht Chorca Dhuibhne gurbh léir gur ag ‘athfhoghlaim’ na Gaeilge a bhí an craoltóir.

“Bhí bunús ana-mhaith aige agus is ag d’iarraidh í a thochailt amach arís a bhí sé, is dócha. Is i bhfeabhas a chuaigh sé i gcaitheamh na seachtaine,” a dúirt an t-urlabhraí.

Fochomhlacht de chuid Chomharchumann Chorca Dhuibhne é Oidhreacht Chorca Dhuibhne, a bunaíodh i 1980 chun an Ghaeilge agus oidhreacht an cheantair a chur chun cinn.

Beidh an chéad chúrsa eile ag Oidhreacht Chorca Dhuibhne ar siúl an mhí seo chugainn, an cúrsa deireadh seachtaine ‘Gaeilge, Siúlóidí agus Blaiseadh Bia’.