FÍSEÁN: ‘Chinn an Rialtas neamhaird a thabhairt ar an Straitéis 20 Bliain, agus tá sé in am tosú as an nua’ – Ó Cuív

Dúirt an Teachta Dála Ó Cuív gur deacair dó aon cheist a chur ar Aire Stáit na Gaeltachta Seán Kyne faoi chur i bhfeidhm na Straitéise. ‘Cén cheist is féidir a chur faoi rud nach bhfuil ag tarlú?’ a d’fhiafraigh sé

FÍSEÁN: ‘Chinn an Rialtas neamhaird a thabhairt ar an Straitéis 20 Bliain, agus tá sé in am tosú as an nua’ – Ó Cuív

Pictiúr: Sam Boal/Rollingnews.ie

Tá ráite ag Éamon Ó Cuív, an t-iar-aire Gaeltachta a chuir an Straitéis Fiche Bliain don Ghaeilge i dtoll a chéile, go bhfuil sé in am deireadh a chur leis an “gcur i gcéill” agus “tosú as an nua arís”.

Ag labhairt dó ag cruinniú de Chomhchoiste Oireachtais na Gaeilge na Gaeltachta agus na nOileán tráthnóna inné, chuir Ó Cuív i leith an Rialtais gur “tógadh cinneadh ag an dtús neamhaird iomlán a thabhairt ar an Straitéis”, go raibh sé in am “é sin a admháil” agus “tosú as an nua arís”.

Dúirt an Teachta Dála Ó Cuív gur deacair dó aon cheist a chur ar Aire Stáit na Gaeltachta Seán Kyne faoi chur i bhfeidhm na Straitéise.

“Cén cheist is féidir a chur faoi rud nach bhfuil á dhéanamh?” a d’fhiafraigh sé.

Mhaígh Ó Cuív go raibh níos mó ar bun maidir le réimsí áirithe den Straitéis in 2010, an bhliain ar tugadh isteach í, ná mar atá ar bun anois. Dúirt sé gur “céim siar” a bhí i gceist i gcuid mhaith réimsí agus gur “cur i gcéill” a bhí ann a bheith ag trácht ar rudaí a bhí ar bun sular tugadh isteach an Straitéis.

Dúirt an t-iar-aire Gaeltachta go raibh sé i gceist gur “Straitéis Rialtais” faoi stiúir an Taoisigh a bheadh sa Straitéis 20 Bliain ionas nach mbeadh ar “Aire bocht na Gaeltachta dul ó roinn go roinn” ag lorg tacaíochta.

Mhaígh Ó Cuív gur mar sin a tharla, áfach, go raibh cúram na teanga ar fad leagtha ar an Aire Stáit agus an Straitéis fágtha “i gcoirnéal beag in intinn an Rialtais”.

Dúirt an tAire Stáit Gaeltachta Seán Kyne go raibh dul chun cinn mór déanta maidir le feidhm a thabhairt don Straitéis 20 Bliain don Ghaeilge in ainneoin na géarchéime eacnamaíochta agus na ciorruithe buiséid a lean.

Dúirt sé gur cuireadh tús leis na ciorruithe sin, ar bhuiséad Údarás na Gaeltachta, mar shampla, le linn don Teachta Dála Ó Cuív féin a bheith ina aire rialtais. Luaigh sé an polasaí oideachais nua don Ghaeltacht agus tús a bheith curtha leis an bpróiseas pleanála teanga sa Ghaeltacht, i measc rudaí eile, mar shampla, den dul chun cinn atá déanta, dar leis.

Dúirt Seán Kyne go bhfuil cáipéis á hullmhú ag Roinn na Gaeltachta, a fhoilseofar i mí Iúil, a chuirfidh síos ar an méid atá bainte amach faoin Straitéis 20 Bliain don Ghaeilge go dtí seo agus ar a bhfuil le déanamh fós.