Tháinig fear na nDéise Thomas Barr sa cheathrú háit sa bhabhta ceannais den chliathrás 400 méadar ag na Cluichí Oilimpeacha i Rio de Janeiro tráthnóna, rás a bhuaigh Kerron Clement ó Stáit Aontaithe Mheiriceá.
Sháraigh Barr curiarracht na hÉireann agus thug sé taispeántas den scoth uaidh.
Ba bheag nár éirigh leis bonn cré-umha a thabhairt leis agus teacht aniar iontach déanta aige i dtreo dheireadh an rása.
I ndiaidh an rása, dúirt Barr gur “dea-scéala dóite” a bhí ann agus an sonas agus brón ina dheireadh. Dúirt sé gurb í “an ceathrú háit an áit is measa ar fad” ach go raibh sé sásta lena thaispeántas agus leis an méid a bhain sé amach ag na Cluichí Oilimpeacha.
Ba é Barr an chéad fhear as Éirinn a cháiligh do bhabhta ceannais sa lúthchleasaíocht ag na Cluichí Oilimpeacha ó bhí David Gillick sa rás 5,000m san Aithin in 2004.
Ba mhór an gaisce ag Barr fiú an babhta leathcheannais a bhaint amach agus é gortaithe den chuid is mó den bhliain.
Agus gortú bléine ag cur as dó, níor éirigh leis dul níos tapa ná 50 soicind in aon rás roimh Rio i mbliana.
Ach sa bhabhta leathcheannais sháraigh an Déiseach curiarracht na hÉireann agus rith sé an rás sin i 48.39 soicind.
Rinne sé amhlaidh tráthnóna nuair a rith sé an babhta ceannais i 47.97 soicind. Ba leor an t-am sin le bonn cré-umha a bhuachan i Londain in 2012 nó le bonn airgid a bhuachan i mBeijing in 2008 agus san Aithin in 2004.
Fág freagra ar '‘Dea-scéal dóite’ do Thomas Barr agus é sa cheathrú háit i Rio'