Tá Craobh Shóisir A1 Iomána Laighean buaite ag Coláiste Eoin tráthnóna agus an ceann is fearr faighte acu ar Phobalscoil Mhaighean Rátha.
Bua ocht bpointe a bhí ag Coláiste Eoin ar deireadh, 2-14 in aghaidh 1-9, agus taispeántas láidir tugtha uathu acu sa dara leath.
Bhuaigh an iarbhunscoil lán-Ghaeilge Craobh Bhaile Átha Cliath an tseachtain seo caite agus ba iad Pádraig Ó Luinneacháin agus Dara Puirséil a d’aimsigh an chuid is mó de na scóranna dóibh sa chluiche sin. B’amhlaidh an scéal inniu i Mainistir Eimhín i gcluiche ceannais A1 an chúige.
B’fhearr a chuir Maighean Rátha tús leis an gcluiche agus bhí siad dhá phointe chun cinn leath bealaigh tríd an chéad leath, 0-4 in aghaidh 0-2. Bhí an chuma ar an scéal go mbeadh an bhearna chéanna fós idir na foirne ag leath ama ach bhí an t-ádh le Coláiste Eoin nuair a chuaigh poc saor a thóg Pádraig Ó Luinneacháin i bhfad amach díreach isteach sa chúl.
D’fhág sé sin go raibh scoil Bhaile Átha Cliath pointe amháin chun cinn ag leath ama, 1-4 in aghaidh 0-6.
Má bhí an t-ádh le Coláiste Eoin i gcás an chúil sin bhain siad lántairbhe as. D’éirigh leo cur leis an bhfarasbarr go luath sa dara leath nuair a d’aimsigh siad trí scór as a chéile, rud a d’fhág ceithre phointe idir na foirne.
Rinne buachaillí Laoise teacht aniar de chineál i lár an dara leath, ach d’aimsigh Coláiste Eoin cúig phointe as a chéile, biaiste scórála a d’fhág ocht bpointe chun cinn iad agus gan ach seacht nóiméad fágtha.
Fuair Adam Kirwan cúl do Mhaighean Rátha chun an bhearna a laghdú, ach d’aimsigh Darach Mac Giolla Bhríde cúl do Choláiste Eoin in am cúitimh, cúl a chuir sméar mhullaigh ar a mbua.
Fág freagra ar 'Craobh Laighean tugtha leo ag buachaillí Choláiste Eoin'