‘Ba scannalach an rud é iarraidh ar imreoir gan Gaeilge a labhairt’ – Uachtarán CLG Aogán Ó Fearghail

Dúirt Uachtarán CLG gur cheart gradam a thabhairt d’aon fhoireann a labhraíonn Gaeilge ag cluiche CLG seachas iarraidh orthu éirí as

‘Ba scannalach an rud é iarraidh ar imreoir gan Gaeilge a labhairt’ – Uachtarán CLG Aogán Ó Fearghail

Dúirt Uachtarán Chumann Lúthchleas Gael, Aogán Ó Fearghail, go bhfuil “díomá [air] féin go pearsanta” faoi na líomhaintí gur iarr réiteoir ar bhaill chumann peile Gaeltachta Béarla a labhairt ag cluiche a bhí á imirt i nGaeltacht na Gaillimhe an deireadh seachtaine seo caite.

Ag labhairt dó le Nuacht TG4, dúirt Ó Fearghail gur “scannalach an rud é más fíor” gur iarr réiteoir de chuid Bhord Chontae na Gaillimhe ar oifigigh nó imreoirí de chuid CLG, Na Piarsaigh, éirí as a bheith ag Gaeilgeoireacht ag cluiche craoibhe i Ros an Mhíl Dé Sathairn.

“Tá suas le 1,000,000 ball i gCumann Lúthchleas Gael agus nuair a bhíonn ballraíocht chomh mór sin ann, tarlaíonn rudaí nár chóir agus nár cheart. Is botún mór a bhí ann más fíor é,” a dúirt sé.

Dúirt sé gur cheart gradam a thabhairt d’aon fhoireann a labhraíonn Gaeilge ag cluiche CLG seachas iarraidh orthu éirí as.

Dúirt sé gur faoi Bhord Chontae na Gaillimhe atá sé anois déileáil leis na líomhaintí gur iarr réiteoir ar bhaill an chumainn Gaeltachta gan Gaeilge a labhairt. Dúirt Ó Fearghail go raibh súil aige go réiteofaí an scéal gan mhoill.

Tháinig sé chun solais ar Nuacht an Iarthair ar RTÉ Raidió na Gaeltachta ag tús na seachtaine go bhfuil gearán déanta ag Na Piarsaigh faoin réiteoir a bhí i bhfeighil ar a gcluiche in aghaidh CLG Bóthar na Trá/Cnoc na Cathrach Dé Sathairn seo caite.

Edel Ní Chuireáin, Ceannaire of RTÉ Raidió na Gaeltachta,  Aogán Ó Fearghail, GAA President, and Áine Ní Churráin, presenter of Barrscéalta, pictured in the  RTÉ Raidió na Gaeltachta studio in Doirí Beaga in Donegal today where Aogán launched a special player award in memory of Séamus Mac Géidigh today on the Barrscéalta programme.
Edel Ní Chuireáin, Ceannaire RTÉ Raidió na Gaeltachta, Aogán Ó Fearghail, Uachtarán CLG, agus Áine Ní Churráin, i stiúideo RTÉ Raidió na Gaeltachta sna Doirí Beaga.

Bhí Ó Fearghail ag labhairt le Nuacht TG4 i nGaoth Dobhair, áit a raibh sé le gradam nua in ómós do Shéamus Mac Géidigh, an craoltóir Conallach a bhásaigh go tobann i mí Iúil, a sheoladh.

Bronnfar Gradam Shéamuis Mhic Géidigh ar an bpeileadóir is fearr i gCraobh Shinsir Peile Dhún na nGall gach bliain feasta. Iriseoirí spóirt an chontae a roghnóidh an buaiteoir.

Ba i stiúideo RTÉ Raidió na Gaeltachta i nDoirí Beaga, mar a raibh Séamus Mac Géidigh ina Bhainisteoir Réigiúin, a seoladh an gradam i gcuimhne an chraoltóra ar maidin.