An Ghaeilge i mbéal an phobail a bhuíochas le Sam Bennett, Bart Simpson agus #bród 1916

Bhí an Ghaeilge go mór i mbéal an phobail ar líne le linn dheireadh seachtaine na Cásca a bhuíochas le Sam Bennett, Bart Simpson agus an #bród a mhúscail ceolchoirm RTÉ Centenary i measc mhuintir na hÉireann.

Bhí an haischlib #bród i measc na haischlibeanna ba mhó trácht ar Twitter in Éirinn aréir le linn chraoladh Centenary ar RTÉ 1. Ba é seo an dara huair i mbliana a bhí focal Gaeilge ag treochtáil ar an líonra sóisialta. Bhí #NollaigNamBan ar an haischlib ba mhó trácht ar Twitter in Éirinn ar feadh tamaill ar an 6 Eanáir.

#bród is now trending in Ireland https://t.co/lnn4sECpiy

— Trendsmap Ireland (@TrendsIreland) 28 Márta 2016

Clár den scoth ag @rte #Centenary – comhghairdeachas! Deireadh seachtaine iontach! #Bród pic.twitter.com/I727naEhWL

— Neasa Ní Chiaráin (@nichiarain) 28 Márta 2016

@CaoimheChats Bhí sé flippin iontach.#Bród

— Séamus Ó Scanláin (@seamushaha) 28 Márta 2016

Níl aon cheist faoi ach gurb é an giolc Gaeilge is mó a thuill aird an phobail ag an deireadh seachtaine an freagra a thug an rothaí Sam Bennett ar iris rothaíochta a thug le fios, le teann magaidh, dar leo féin, gur Briotanach a bhí i rothaí Charraig na Siúire. Pé ar bith, ní raibh aon ghlacadh ag Bennett, a bhuaigh an chéad stad de Critérium International na Corsaice, le giolc Cycle Sport Magazine.

Gabh mo leithsceil @cyclesportmag ach is eireannach mise. Go raibh maith agaibh go leir don tachaíocht agus do fhocail cineálta ?

— Sam Bennett (@Sammmy_Be) 26 Márta 2016

Thuill freagra Gaeilge Bennett na céadta athghiolcacha agus croíthe.

Idir an dá linn,ghnóthaigh físeán scigaithrise Gaeilge, bunaithe ar The Simpsons os cionn 250,000 amharc Facebook nuair a foilsíodh é ag an deireadh seachtaine. Ba iad an ‘banna ceoil’ An Criú Craiceáilte a chuir Gaeilge i mbéal Bheairtle Mhic Shim.

Is léir óna leathanach Facebook gur de thoradh ar shraith pictiúr na hArdteiste a bunaíodh An Criú Craiceáilte. Tagraíonn a bport nua, ‘Is Maith Liom Techno’ do mhír chluastuisceana a bhí mar chuid de scrúdú na hArdteistiméireachta roinnt blianta ó shin. Bítear ag spochadh fós as an mír áirithe sin ina raibh fear a bhí i bhfad níos sine ná Bart Simpson ag déanamh aithrise ar ghlór an charachtair cháiliúil.