An chéad aip seirbhísí airgeadais Gaeilge riamh seolta ag Comhar Creidmheasa Chorca Dhuibhne

Tá baill an Chomhair Creidmheasa anois in ann a gcuid cuntas a sheiceáil agus a riaradh ‘ó aon áit de ló is d’oíche’ trí mheán na Gaeilge ar an aip nua a seoladh le deireanas

Eamon Fitzmaurice with Ruth Uí Ógáin, Sharon Hickey, Siún Dowd O'Connor, Anne Curran, Micheál Ó Cinnéide and Maireád Sheehy (Dingle Credit Union) lunching of the Credit Union Mobile App in Dingle.
Bainisteoir fhoireann caide Chiarraí Eamon Fitzmaurice ag seoladh aip Chomhar Creidmheasa Chorca Dhuibhne le foireann Chomhar Creidmheasa Chorca Dhuibhne: Ruth Uí Ógáin, Sharon Hickey, Siún Dowd O’Connor, Anne Curran, Micheál Ó Cinnéide agus Maireád Sheehy

Tá an chéad aip seirbhísí airgeadais a fheidhmíonn trí mheán na Gaeilge curtha ar fáil ag Comhar Creidmheasa Chorca Dhuibhne sa Daingean.

Seoladh le deireanas seirbhísí nua ar-líne agus aip an Chomhair Creidmheasa – an chéad uair a bhfuil seirbhísí dá gcineál ar fáil i nGaeilge.Pic_Comhar_Creidmheasa

Tá baill an Chomhair Creidmheasa anois in ann breathnú ar a gcuid cuntas ar líne tar éis dóibh clárú leis an tseirbhís ar shuíomh na heagraíochta. Táthar in ann billí a íoc, airgead a aistriú go cuntais eile agus tuarastal agus íocaíochtaí eile a fháil isteach ina gcuntas tríd an aip agus an suíomh idirlín.

Dúirt Mícheál Ó Cinnéide, bainisteoir Chomhar Creidmheasa Chorca Dhuibhne, go bhfuil an eagraíocht “an-mhórálach” gurb iad an chéad institiúid airgeadais in Éirinn a bhfuil aip Ghaeilge acu.

“Cuireann sé áthas orainn ár gcuid seirbhísí dátheangacha ar líne a fhógairt agus go háirithe an aip shoghluaiste a bheidh ar fáil as Gaelainn leis.

“Táimid an-mhórálach gur sinne an chéad institiúid airgeadais sa tír go bhfuil aip dá leithéid forbartha againn as Gaelainn, forbairt a chiallaíonn gur féidir leat do chuid ghnó ar fad a dhéanamh trí Ghaelainn leis an gComhar Creidmheasa ar an aip,” a dúirt sé.

Forbraíodh an aip i dteannta Progress Systems, páirtnéirí an Chomhair Creidmheasa sa teicneolaíocht faisnéise.

Dúirt Ó Cinnéide gur “buntáiste mór” a bheidh ann ann do bhaill na heagraíochta go mbeidh teacht acu ar a gcuid cuntas ar-líne “ó aon áit de ló is d’oíche”.