Aisteoirí óga ag teastáil do scannán faoi Sheosamh Ó hÉanaí

Tá cailín idir sé agus ocht mbliana d’aois á lorg ag Rowan Castings agus deirfiúr nó deartháir léi a bheadh níos óige ná sin - idir ceithre agus sé bliana d’aois

Sheosamh Ó hÉanaí

Tá aisteoirí óga as Conamara á lorg arís ag an ngníomhaireacht aisteoireachta Rowan Castings do scannán faoin amhránaí sean-nóis Seosamh Ó hÉanaí, Song of Granite.

An geábh seo tá cailín idir sé agus ocht mbliana d’aois á lorg ag an ngníomhaireacht agus deirfiúr nó deartháir léi atá níos óige ná sin – idir ceithre agus sé bliana d’aois.

“Tá sé tábhachtach go mbeadh an duine is sine den bheirt ina cailín ach is cuma más cailín nó buachaill an duine óg,” a mhínigh Amy Rowan, stiúrthóir na bpáirteanna.

Dúirt sí freisin go mb’fhearr i bhfad dá mba ón teaghlach céanna a thiocfadh an bheirt a ghlacfadh na páirteanna.

Beidh an bheirt le roghnú go luath agus iarrtar ar thuismitheoirí teagmháil a dhéanamh le Rowan Castings más spéis lena gclann cur isteach ar na páirteanna.

Bhí éisteachtaí ar siúl i mí na Nollag seo caite in Indreabhán le buachaill óg, a raibh an amhránaíocht ar an sean-nós aige, a aimsiú don scannán.

Tá obair déanta ag an gcomhlacht Rowan Casting leis na scannáin Adam and Paul, Garage, Kings agus na cláracha teilifíse The Clinic, Pure Mule agus Moone Boy.